१ लाख २० हजार फिटमाथिबाट विश्वकपको ट्रफी टूर सुरु

काठमाडौँ- भारतमा अक्टोबर-नोभेम्बरमा आयोजना हुने आईसीसी एकदिवसीय विश्वकपको ट्रफी टुर ‘स्ट्राटोस्फेरिक स्केल’ बाट सुरु भएको छ । आईसीसीले जनाएअनुसार पृथ्वीभन्दा १ लाख २० हजार फिटमाथि सोमबार विश्वकपको ट्रफी टुर सुरु गरिएको हो ।

१ लाख २० हजार फिटमाथिबाट ट्रफी भारतको अहमदाबादमा रहेको नरेन्द्र मोदी क्रिकेट स्टेडियममा ल्यान्ड गरेको थियो ।

ट्रफी ‘बेस्पोक स्ट्र्याटोस्फेरिक बेलुन’मा जोडिएको तथा फोरके क्यामेराबाट पृथ्वीको वायुमण्डलको छेउमा बसेर ट्रफीका केही आश्चर्यजनक दृष्यहरु खिचिएको आईसीसीले उल्लेख गरेको छ ।

भारतले अक्टोबर ५ देखि नोभेम्बर १९ तारिखसम्म आयोजना गर्ने विश्वकपका लागि सार्वजनिक गरिएको ट्रफीको टूर विभिन्न १८ देशमा हुनेछ । ट्रफी भने नेपाल ल्याइने छैन ।

ट्रफी टूर जुन २७ बाट सुरु भएर सेप्टेम्बर ४ तारिखसम्म चल्ने आईसीसीले जनाएको छ ।