क्रिसमसमा आउने भयो ‘वन्डर वुमन’

बारम्बार प्रदर्शन मिति सरेको ‘वन्डर वुमन १९९८’ले अन्ततः प्रदर्शन मिति तय गरेको छ । फिल्म अब क्रिसमसको छेको पारेर डिसेम्बर २५ मा अमेरिकाका  सिनेमा हलमा रिलिज हुनेछ । निर्माण कम्पनी वार्नर ब्रोजले विज्ञप्ति जारी गर्दै फिल्म हलसँगै एचबिओ म्याक्समा पनि सोही दिन रिलिज हुने जनाएको छ । फिल्म विदेशी बजारमा भने ७ दिन अगाडि नै रिलिज हुनेछ । 

फिल्म सबैभन्दा पहिला जुन ५ मा रिलिज हुनेवाला थियो । तर, कोभिड १९ विश्व भ्रमणमा निस्किएपछि फिल्मको रिलिज धकेलिएर अगस्ट १४ मा पुगेको थियो । 
वार्नर ब्रोजले यसरी फिल्म रिलिज गर्ने निर्णय लिन कठिन भए पनि अन्ततः फिल्म हलमा रिलिज हुने कुराले सन्तुष्टि दिएको बताएको छ । त्यसैगरी फिल्मकी मुख्य कलाकार गल गडोटले पनि फिल्म हलमा रिलिज हुन लागेकोमा खुशी व्यक्त गरेकी छिन् । उनले लेखेकी छिन्  ‘ सही समयमा यो फिल्म रिलिज हुन लागेको छ । किनकि हामी अहिले सबैजना रमाउने बहाना खोजिरहेका छौं । यो फिल्मले त्यो बहाना दिन्छ भन्नेमा म विश्वस्त छु ।’ 

विश्वभर नै यो फिल्मको रिलिजलाई उत्सुकताका साथ हेरिएको छ । बार्नर ब्रोजकै ‘टेनेट’ले अपेक्षाकृत व्यापार नगरेको प्रतिक्रिया पाइरहेको बेला बार्नरले ‘वन्डर वुमन १९८४’ रिलिज गर्न लागेको हो । ‘टेनेट’को लाइफटाइम कलेक्सनपछि निर्देशक क्रिस्टोफर नोलान र स्टुडियोको कुरा बाझिएको थियो । 
प्याट जेकिन्सले निर्देशन गरेको फिल्ममा गल गडोटसँगै क्रिस पाइनको पनि अभिनय रहेको छ ।