पशुपतिको जलहरीबारे सत्यतथ्य बाहिर ल्याउन सांसद पौडेलको माग

काठमाडौँ– सत्तासीन दल नेकपा माओवादी केन्द्रका सांसद देवेन्द्र पौडेलले पशुपतिको जलहरीबारे सत्यतथ्य बाहिर ल्याउन माग गरेका छन् । सोमबार प्रतिनिधिसभा बैठकमा शून्य समयमा बोल्दै उनले यसबारे सत्यतथ्य जाँच गरी सार्वजनिक गर्नुपर्ने बताए ।

जलहरीको विषयमा संसदमा पनि प्रशस्तै उठेको बताउँदै उनले भने, ‘भएको के हो त्यहाँ ? आज पशुपति विकास कोष, नेपाल प्रहरी सुरक्षा निकाय, सुनचाँदी व्यवसायी संघ, गुणस्तर तथा नापतौल विभाग, पुरातत्व विभाग, खानी तथा भूगर्भविभाग र जनप्रतिनिधिहरूले त्यहाँको सुन खोजेर जोख्दै हुनुहुन्छ भन्ने हामीले सुनेका छौँ । कति सुन हराएको हो ? कति सुन बाँकी छ ? के स्थिति हो ? यो कुनै ट्रकमा ल्याएको सामग्री जोख्ने कुरा होइन । यो सदनमा सत्यतथ्य जानकारी गराउन सम्बन्धित निकायलाई म जानकारी गराउन अनुरोध गर्दछु ।’

सोमबार अख्तियार दुरुपयोग अनुसन्धान आयोगले सुरक्षा निकाय, पशुपति विकास कोषलगायत विभिन्न निकायसँग मिलेर पशुपतिको जलहरी तौलेको थियो ।