सुधार गृहहरूलाई स्वास्थ्य मन्त्रालय अन्तर्गत ल्याउन सांसद कार्कीको माग

काठमाडौँ– राष्ट्रिय स्वतन्त्र पार्टीका सांसद डा.तोसिमा कार्कीले गृहमन्त्रालय अन्तर्गत रहेका सुधार गृहहरूलाई स्वास्थ्य मन्त्रालय अन्तर्गत ल्याउन माग गरेकी छिन् । सोमबार प्रतिनिधिसभा बैठकको शून्य समयमा बोल्दै उनले यस्तो माग गरेकी हुन् । 

‘डब्लुएचओले लागू औषध दुव्र्यसनलाई रोगको रुपमा लिएको छ,’ उनले भनिन्, ‘ड्रग एबयुज इज ए डिजिज नट ए क्राइम । तर हाम्रो परिवेशमा मुख्य समस्या भनेकै यसलाई मनोसामाजिक समस्या भन्दा पनि अपराधाको रुपमा मान्नु हो । आजसम्म पनि सुधार गृहहरू गृहमन्त्रालय अन्तगर्त छन् ।’

उनले अगाडि भनिन्, ‘अपराधी सरह व्यवहार गर्ने हो भने यो समस्या बढीरहन्छ । लागू औषध कारोबारी र प्रयोगकर्तालाई एउटै दृष्टिले हेर्न मिल्दैन । अधिकांश प्रयोगकर्ताहरू १६ वर्ष मुनिका भएकाले साथीको संगतले विभिन्न रोगहरू जस्तै यौन रोग हेपाटाइटिसबाट ग्रस्त हुने देखिन्छ । मुलभूत यसको कारण मनोसामाजिक पाटोको समाधानको जरुरी छ । त्यसैले सुधारगृहहरूलाई स्वास्थ्य मन्त्रालय अन्तगर्त ल्याउन जरुरी छ ।’

उनले सरकारले ल्याएको बजेटमा पनि सुधारगृहहरूका लागि प्रोत्साहन आवश्यक रहेको बताइन् ।