मनसुन भित्रियो हाम्रो तयारी भने शून्य छ : सांसद नेपाली

काठमाडौं – राष्ट्रिय स्वतन्त्र पार्टीका सांसद शिव नेपालीले मनसुन भित्रिए पनि तयारी शून्य रहेको गुनासो पोखेका छन् ।  

आइतबारको प्रतिनिधिसभामा बोल्दै उनले प्राकृतिक विपत्ति आउने र जनतालाई सचेतनामा राख्नुपर्ने बताएका छन् । उनका अनुसार विपद् व्यवस्थापनको दायित्व सरकारको भएतापनि उक्त विषयमा सदनमा धेरैपटक ‍उठान भएतापनि सरकारको तयारी शून्य भएको जिकिर गरेका छन्  । 

सदनमा तथ्याङ्क र विभिन्न देशहरूको उदाहरण दिँदै उनले भने, ‘नेपाल चट्याङको दृष्टिकोणले विश्वकै उच्च जोखिमयुक्त क्षेत्रमा पर्छ । राष्ट्रिय विपद् न्यूनीकरण प्राधिकरणको एक तथ्याङ्क अनुसार विगत केही महिना यता मुलुकमा दुईसय ३६ चट्याङको घटना भएकोमा ८० को मृत्यु, २०२ घाइते साथै, ३५३ परिवार प्रभावित भएको पाइएको छ । जुन संयुक्त राज्य अमेरिका, अष्ट्रेलीया साथै केन्याको भन्दा धेरै हो ।’ 

दाङ, आबुखैरेनी र म्याग्दीमा चट्याङ लागेर मृत्यु हुनेको कुरा राख्दै उनले सरकार विपद् व्यवस्थापनको विषयमा निकै गम्भीर हुनुपर्ने बताएका छन् ।

साथै पृथ्वी राजमार्गको कुरा जोड्दै उनले डाँडाहरू खनिएको हुँदा पहिरो जाने सम्भावना रहेको र सो क्षेत्रका सबै तयारी अवस्थामा रहनुपर्ने बताएका छन् । 
सदनमा बोल्दै उनले सभामुख मार्फत सम्बन्धित निकायको विशेष ध्यानाकर्षण गराएका छन् ।