शून्य समय र विशेष समयमा उठेका प्रश्नको उत्तर सरकारले दिइरहेकै छ : प्रचण्ड

काठमाडौँ– प्रधानमन्त्री पुष्पकमल दाहाल प्रचण्डले प्रतिनिधिसभाको शून्य समय र विशेष समयमा उठेका प्रश्नको उत्तर सरकारले दिइरहेको स्पष्ट पारेका छन् ।

शुक्रबार प्रतिनिधिसभामा प्रधानमन्त्रीसँगका प्रश्नोत्तरका क्रममा सांसद अन्जनी श्रेष्ठले शून्य र विशेष समयमा उठाइएका प्रश्नको उत्तर नपाएको गुनासो गरेकी थिइन । 

‘सम्मानित सदनमा शून्य समय र विशेष समयमा मान्य सदस्यले उठाएका विभिन्न प्रश्नहरूमा सरकार संवेदनशील भइ तिनको जवाफ नियमित रुपमा दिइनै रहेको छ,’ उनले भने, ‘सदनमा उठाइएको प्रश्न र जिज्ञासाहरूको जवाफ दिने जिम्मेवारी र उत्तरदायित्वबाट सरकार कहिल्यै पछि हटेको छैन । र कहिल्यै पछि हट्ने पनि छैन ।’

 जनसरोकारका उचित विषयलाई उचित सम्बोधन गर्ने कुरामा सरकार दृढ रहेको उनले बताए ।