मधेस प्रदेशमा कम बजेट विनियोजन भयो भन्ने कुरा साँचो होइन : प्रधानमन्त्री

काठमाडौँ– प्रधानमन्त्री पुष्पकमल दाहाल प्रचण्डले मधेस प्रदेशमा कम बजेट विनियोजन भयो भन्ने कुरा साँचो नभएको बताएका छन् ।

शुक्रबार प्रतिनिधिसभामा प्रधानमन्त्रीसँगका प्रश्नोत्तरका क्रममा सांसद अजयकुमार चौरासियाले उठाएको प्रश्नको जवाफ दिँदै उनले यस्तो बताएका हुन् ।

‘मधेस प्रदेशमा कम बजेट विनियोजन भयो भन्ने कुरा साँचो होइन,’ उनले भने, ‘संघीयताको मर्म अनुरुप संघबाट प्रदेश र स्थानीय तहमा हुने वित्तीय हस्तान्तरणको १५ प्रतिशतभन्दा बढी रकम मधेस प्रदेशमा नै जाने गरेको छ । यसका अतिरिक्त संघबाट सञ्चालन हुने पूर्व पश्चिम राजमार्ग, पतलैया वीरगञ्ज कोरिडोर, चन्द्रपुर गौर राजमार्ग, हुलाकी राजमार्ग, सुनकोशी मरिन डाइर्भसन, बागमती कमला चन्द्र नहर लगायतका सिचाईँ आयोजना विभिन्न औद्योगिक पूर्वाधार तथा व्यापारिक पूर्वाधार आयोजनाहरू तराई मधेसलाई लक्षित गरेर नै अगाडि बढेका छन् ।’

तराईमधेश समृद्धी कार्यक्रम र तराई जोड्ने द्रुत मार्गहरू पनि मधेसमा नै पर्ने उनकाे भनाइ छ । पर्साको वीरगञ्जको विकास सरकारको प्राथमिकतामा रहेको समेत उनले बताए ।