राज्यलाई बुझाएको राजश्वको २० प्रतिशत बजेट पनि मधेश प्रदेशमा फिर्ता गएको छैन : सिके राउत

काठमाडौँ– जनमत पार्टीका अध्यक्ष तथा सांसद सिके राउतले मधेश प्रदेशले राज्यलाई बुझाएको राजश्वको २० प्रतिशत बजेट पनि मधेश प्रदेशमा फिर्ता नगएको भन्दै गुनासो गरेका छन् । शुक्रबार प्रतिनिधिसभाको मन्त्रालयगत विनियोजित बजेटको छलफलमा भाग लिँदै उनले यस्तो बताएका हुन् । 

‘गण्डकी प्रदेशले जति राजश्व दिन्छ, त्यसको ५ गुणा बढी बजेट उसले पाएको छ,’ सांसद राउतले भने, ‘कर्णाली प्रदेशले जति राजश्व तिरेको छ, त्यसको २९ गुणा बढी बजेट उसले पाएको छ । सुदूरपश्चिमले जति राजश्व यो राज्यलाई दिएको छ, त्यो भन्दा ६ गुणा बढी बजेट उसले पाएको छ । तर, मधेशले जति राजश्व दिएको छ, त्यसको २० प्रतिशत पनि फिर्ता मधेशमा गएको छैन । यसले कुन प्रकारको औपनिवेशिक शासन मधेशमा लादिएको छ भन्ने तथ्य देखाउँछ ।’ 

मधेशका लागि छुट्याइएकाे बजेट हेर्दा काम गर्ने कालु र मकै खाने भालुको उखानजस्तै भएको उनको तर्क छ । अन्य जिल्लाकाे तुलनामा सप्तरी जिल्लालाई बजेट नदिइएको भन्दै उनले सरकारलाई प्रश्न समेत गरेका छन् ।