गोकुल बास्कोटाले अर्थमन्त्रीको पक्षमा बोल्दै भने– उहाँलाई बलीको बोको बनाउन खोजिएको थियो, उम्कनुभयो

काठमाडौं– प्रमुख प्रतिपक्षी दल नेकपा एमालेका सांसद गोकुल बास्कोटाले करका दर हेरफेर विवादमा अर्थमन्त्री प्रकाशशरण महत निर्दोष रहेको जिकिर गरेका छन् । संसदमा जारी बजेटमाथिको छलफलमा सहभागी हुँदै बास्कोटाले अर्थमन्त्री महतको पक्षमा बोल्दै बचाउ गरे । 

बास्कोटाले अप्रत्यक्ष रूपमा पूर्वअर्थमन्त्री जनार्दन शर्माले यसपालिको बजेट निर्माणमा पनि हस्तक्षेप गरेको आरोप लगाए । ‘धन्यवाद छ, अर्थमन्त्रीज्यूलाई । कम्तीमा यसपालि अर्थ मन्त्रालयमा मुसो पसेन,’ उनले भने, ‘कागज गडबड भएछ, त्यो पनि एउटैको काम हो । पहिला जसले हुलेको थियो, अहिले त्यसैले हुलेको हो । उहाँ आउनुभन्दा अगाडि हुलिएको थियो । त्यही सूचना छ ।’

अर्थमन्त्री बलीको बोको हुनबाट जोगिएको बताउँदै उनले भने, ‘उहाँलाई बलीको बोको बनाउन खोजिएको थियो, उम्कनुभयो । हाम्रो समर्थन छ ।’

आगामी आर्थिक वर्ष २०८०–८१ को बजेट निर्माणको क्रममा अर्थमन्त्री महतले करका दर हेरफेरमा भन्सार विभागका पूर्वनासु रामकृष्ण श्रेष्ठलाई संलग्न गराएको प्रमुख प्रतिपक्षी एमालेसहित अन्य दलको आरोप थियो । बुधबारको बैठकमा भने बास्कोटाले अर्थमन्त्रीलाई फसाउन खोजिएकाले उनलाई आफ्नो पार्टीको समर्थन रहेको स्पष्ट पारे ।