सरकारलाई मनिष झाको प्रश्न : अनसन बसेपछि मात्रै सरकारले जवाफ दिने हो ?

काठमाडौँ– राष्ट्रिय स्वतन्त्र पार्टीका सांसद मनिष झाले सरकारले सदनमा उठेका प्रश्नको जवाफ नदिएको भन्दै प्रश्न गरेका छन् ।

उनले सरकारले अनसन बसेपछि मात्रै सरकाले जवाफ दिने हो भन्दै सरकारलाई पश्न गरेका हुन् । मंगलबारको संसद् बैठकको शून्य समयमा बोल्दै उनले यस्तो प्रश्न राखेका हुन् ।

‘भ्रष्टाचारको कुरा हामी पटक पटक उठाउँछौँ,’ सांसद झाले भने, ‘सबै  भन्दा अपेक्षा राखेर सदनमा उठाउँछौँ । तर जवाफ आउँदैन सरकार पक्षले यसको जवाफ दिँदैन । मैले यो सदनमा चार पटक जानकी मन्दिरको टायल र त्यहाँ विजुली बत्तिमा भएको भ्रष्टाचारको प्रसंग उठाएँ । जवाफ मागिसकेँ । सरकारले जवाफ दिँदैन । सत्ता पक्षकै सांसद अनशनमा बस्नुपर्ने बाध्यात्मक अवस्थामा के हामीलाई पनि त्यही सन्देश दिन खोजेको हो सरकारले ? कि गएर अनसन बस अनि जवाफ पाउँछौँ । हो भने हामी तयार छौँ ।’

उनले नक्कली भुटानी शरणार्थी प्रकरणमा केही शीर्ष नेताले आफू निर्दोष छु भन्दै अन्तर्वार्ता दिँदैमा सबै चिज नपखालिने पनि बताए ।

‘देशमा अहिले सबैतिर चर्चा भइरहेको भ्रष्टाचारको विषय नक्कली भुटानी शरणार्थीको विषय र त्यसमा हामीले अपेक्षा गरिरहेको केही निर्णयहरू छन्,’ उनले भने, ‘केही सुनियोजित सेटिङमा गरिएको टेलिभिजन अन्तरर्वार्ताहरूले सबै प्रश्नहरूको जवाफ दिँदैनन् । त्यसले सबै चिज पखालियो भन्ने भ्रम पनि नरोहोस् ।’