नीति तथा कार्यक्रममा कर्णालीमा संग्रहालय बनाउने कुरा नसमेटिनु दुःखद् : विनिता कठायत

काठमाडौँ– प्रतिनिधिसभा सदस्य विनिता कठायतले सरकारको नीति तथा कार्यक्रममा कर्णालीको संस्कृति सम्वर्द्धन र संग्रहालय बनाउने कुरा नसमेटिनु दुःखद् भएको बताएकी छन् । सोमबारको संसद् बैठकमा बोल्दै कठायतले सबैभन्दा बढी सम्पदा स्थल र सम्पदा भएको कर्णालीलाई किन विश्व सम्पदा सूचीमा नराखेको भन्दै प्रश्न गरिन् । 

‘काठमाडौँ उपत्यका भन्दा बाहिर सबैभन्दा बढी सम्पदा स्थल र सम्पदा संख्या रहेको कर्णाली र त्यहाँको मूर्त, अमूर्त सम्पदालाई पनि विश्व सम्पदा सूचीमा राख्ने पहल किन नगरिएको ? नेपाली मौलिक संस्कृतिको उद्गम स्थल जुम्ला सिँजाले वास्तवमा गोरखाली संस्कृतिभन्दा वृत्त आयात दिन्छ,’ उनले भनिन्, ‘संस्कृति सम्वर्द्धन र संग्रहालय बनाउने नीतिमा कर्णाली नसमेटिनु दु:खद् कुरा हो । कर्णालीको कुरा यस राज्य र सदनले नबुझेको हो कि ? बुझ पचाएको हो ? बुझ पचाएको हो भने यस सदन र सरकारले यो चोटी कर्णालीका कुरा बुझ्नुपर्यो । सुनिदिनु र हेरिदिनु पर्यो ।’