मुआब्जा विवादको समस्या समाधान गर्न विशिष्टिकृत संरचना बनाऔँ : सांसद गौतम

फाइल तस्बिर

काठमाडौँ- राष्ट्रिय स्वतन्त्र पार्टीकी सांसद सोविता गौतमले मुआब्जा विवादको समस्या समाधान गर्न विशिष्टिकृत संरचना बनाउनुपर्ने बताएकी छन् ।

आइतबार सरकारको आर्थिक वर्ष २०८०/८१ को नीति तथा कार्यक्रम माथि छलफल गर्दै सांसद गौतमले देशका विभिन्न आयोजनाहरू मुआब्जा विवादका कारण सम्पन्न हुन नसकेको भन्दै ति समस्याहरूलाई समाधान गर्न विशिष्टिकृत संरचना बनाउनुपर्ने बताएकी हुन् । उनले रैथाने बाली, बिउविजन, नस्ल र कृषि तथा पशुपक्षीको जैविक विविधता संरक्षणमा स्थानीय तह र समूहहरूलाई स्रोत दिएर जिम्मेवार बनाउनुपर्ने बताइन् ।

त्यसैगरी कृषि, पशुपक्षी र खाद्य सम्बन्धी प्रयोगशाला अन्तर्राष्ट्रिय मापदण्ड अनुरूप स्तरोन्नति गरी यस्तो वस्तुहरूको ओसार–पसार हुने सबै भन्सार विन्दु र मुख्य सहरहरूमा प्रयोगशाला स्थापना हुनुपर्ने उनको भनाइ छ ।

उनले काठमाडौँ क्षेत्र नम्बर २ मा रहेको साँखु र बज्रयोगिनीलाई विश्वसम्पदा सूचीमा समावेश गर्न समेत आग्रह गरिन् । विद्युतीय सवारी साधनको प्रयोगलाई बढाउन होटल, राजमार्ग र विभिन्न ठाउँहरूमा चार्जिङ सेन्टर स्थापना हुनुपर्नेमा पनि उनले जोड दिइन् ।