पञ्जाबलाई पराजित गरेको राजस्थानको प्लेअफ सम्भावना कायमै

काठमाडौँ- इन्डियन प्रिमियर लिग (आईपीएल) मा पञ्जाब किंग्सलाई पराजित गर्दै राजस्थान रोयल्सले प्लेअफको सम्भावना कायमै राखेको छ । शुक्रबार राति धरमशालामा भएको खेलमा राजस्थानले पञ्जाबलाई ४ विकेटले पराजित गर्‍यो ।

जितसँगै १४ खेलबाट १४ अंक जोड्दै राजस्थान तालिकाको पाँचौ स्थानमा छ । यता १३ खेलबाट १४ अंक जोडेको रोयल च्यालेन्जर्स बैँग्लोर चौँथो स्थानमा छ । बैँग्लोरले भने शीर्ष स्थानको गुजरात टाइटन्ससँग अन्तिम खेल खेल्नेछ । छैटौ स्थानको मुम्बई इन्डियन्सको पनि १३ खेलबाट १४ अंक छ र उसले अन्तिम खेल सनराइजर्स हैदराबादविरुद्ध खेल्ने तालिका रहेको छ । प्लेअफका लागि राजस्थान, बैँग्लोर र मुम्बईको सम्भावना कायमै रहेको छ ।

शुक्रबार राति पञ्जाबले दिएको १ सय ८८ रनको लक्ष्य राजस्थानले १९ ओभर ४ बलमा ६ विकेट गुमाएर पूरा गर्‍यो । राजस्थानलाई जित दिलाउन देवदत्त पाडिकलले ५१ रन तथा यशस्वी जैसवालले ५० रन बनाए ।

यसअघि टस हारेर पहिले ब्याटिङ गरेको पञ्जाबले निर्धारित २० ओभरमा ५ विकेटको क्षतिमा १ सय ८७ रन बनायो । उसका लागि लियाम लिभिङस्टोनले सर्वाधिक ४९ रन बनाए । राजस्थानका नवदिप सैनीले सर्वाधिक ३ विकेट हात पारे ।

आईपीएलमा आज दुई खेल हुने तालिका रहेको छ । पहिलो खेल दिल्ली क्यापिटल्स तथा चेन्नई सुपर किंग्सबीच हुनेछ । दोस्रो खेल कलकता नाइट राइडर्स र लखनउ सुपर जायन्ट्सबीच हुने तालिका छ ।