गाँजाकाे 'लास्ट पप' कसले तान्ने भन्नेमा विवाद हुँदा आफ्नै साथीको हत्या

जनकपुरधाम । गाँजा तान्ने विषयलाई लिएर भएको विवादमा आफ्नै साथीको हत्या गरेको आरोपमा धनुषा प्रहरीले चार जनालाई नियन्त्रणमा लिएको छ । नियन्त्रणमा लिएकाहरु मध्ये दुई जनालाई बिहीबार पत्रकार सम्मेलन गरी धनुषा प्रहरीले सार्वजनिक गरेको छ भने अन्य दुई जना अनुसन्धानमा रहेको प्रहरीले जनाएको छ । 

प्रहरी नियन्त्रणमा रहेकाहरुमा जनकपुरधाम ७ जानकीनगरका २० वर्षीय अनुज तिवारी, २५ वर्षीय जियाउल राईन, वडा नं. ८ बस्ने ३१ वर्षीय राजकुमार साह र नगराईन नगरपालिका २ बस्ने २१ वर्षीय जितेन्द्र कुमार मण्डल रहेका छन् । 

धनुषाका प्रहरी उपरीक्षक विश्वराज खडकाले मृतक जनकपुरधाम उपमहानगरपालिका ७ बस्ने २४ वर्षीय मो. गुलाम मंसुर भन्ने रवानी मंसुर र पक्राउ परेका युवाहरुबीच गाँजा तान्ने विषयमा विवाद भएको थियो । विवादकै क्रममा एक अर्कालाई धक्का दिने क्रममा रवानी मंसूरको छतबाट लडेर मृत्यु भएको जानकारी दिए । 
उनले भने 'ती पाँचै जना साथी सीमापारी जटहीबाट लागूऔषध सेवन गरेर आएको थियो । राति करिब एक बजेतिर जनकपुरधाम २३ लादो बेलास्थित एक निर्माणाधीन घरमा गाँजा तान्ने बसे । गाँजा तान्दातान्दै अन्तिम कसले तान्ने विषयमा विवाद भयो र एकआपसमा धक्कामुक्की हुँदा रवानी छतबाट लडेर घाइते भएको थियो । उपचारकै क्रममा प्रादेशिक अस्पताल जनकपुरधाममा उनको मृत्यु हुन गयो ।'

घटनाबारे एसपी खड्काले भने प्रहरीलाई अबेर राति आफ्नै घरको छतबाट लडेर एकजना घाइते भएकाे भन्दै प्रहरी कन्ट्रोललाई फोन आएकाे थियाे । तर घटनाको अनुसन्धान गर्दै जाँदा गाँजाको अन्तिम कस कसले तान्ने विषयलाई विवाद हुँदा घटना घटेको खुल्न आएको प्रहरीले जनाएकाे छ।