आईसीसी विश्वकपः इंग्ल्यान्ड र न्यूजिल्यान्डबीच उद्‍घाटन खेल हुने

काठमाडौँ- भारतमा अक्टोबर ५ तारिखबाट सुरु हुने आईसीसीको एकदिवसीय पुरुष विश्वकपको उद्घाटन खेलमा इंग्ल्यान्ड र न्यूजिल्यान्ड भिड्ने भएका छन् । उद्घाटन तथा नोभेम्बर १९ मा हुने फाइनल अहमदाबादमा हुने क्रिकबजले जनाएको छ ।

भारतले भने पहिलो खेल अस्ट्रेलियाविरुद्ध चेन्नईमा खेल्ने छ । भारत र पाकिस्तानबीचको खेल भने अक्टोबर १५ मा हुने तालिका रहेको छ ।

विश्वकपमा भने आयोजक भारतसँगै इंग्ल्यान्ड, न्यूजिल्यान्ड, पाकिस्तान, अस्ट्रेलिया, बंगलादेश, अफगानिस्तान र बंगलादेशले स्थान सुरक्षित गरिसकेका छन् ।

जिम्बाब्वेमा जुन १८ देखि जुलाई ९ तारिखसम्म आयोजना हुने विश्वकप छनोटबाट जिम्बाब्वेसँगै वेस्ट इन्डिज, श्रीलंका, आयरल्यान्ड, नेदरल्यान्ड्स, नेपाल, ओमान, स्कटल्यान्ड, युनाइटेड अरब इमिरेट्स र अमेरिकामध्ये दुई टोलीले विश्वकपमा स्थान सुरक्षित गर्नेछन् ।