कर्णालीका नवनियुक्त ३ मन्त्रीको शपथ भोलि

सुर्खेत : कर्णालीका नवनियुक्त तीन जना मन्त्रीले बिहीबार पद तथा गोपनियताको शपथ लिने भएका छन् । मुख्यमन्त्री महेन्द्रबहादुर शाहीले बुधबार नियुक्त गरेका मन्त्रीले बिहीबार बिहान ११ बजे सपथ लिने भएका हुन् । 

रुकुम पश्चिमबाट निर्वार्चित सांसद गोपाल शर्मा र सुर्खेतबाट निर्वाचित सांसद विन्दमान बिष्ट र सीता नेपालीले प्रदेश प्रमुख गोविन्दप्रसाद कलौनिबाट शपथ लिने भएका छन् । मुख्यमन्त्री शाहीले बिष्टलाई आन्तरिक मामिला, कानुन, युवा तथा खेलकुद मन्त्रालय, नेपालीलाई जलश्रोत तथा उर्जा विकास मन्त्रालय र शर्मालाई आर्थिक मामिला तथा योजना मन्त्रीमा नियुक्त गरेका छन् । 

शाहीले मन्त्रीपरिषद् पुर्नगठन गर्ने तयारी गरेतापनि आन्तरिक विवादका कारण मन्त्रीपरिषद् पुर्नगठनको काम रोकिएको थियो । फ्लोर क्रस गरेका तीन जना सांसदलाई बैशाख चार गते नै मन्त्रीमा नियुक्त गरिसकेका छन् । जसअन्र्तगत उद्योग पर्यटन वन तथा वातावरण मन्त्रालयमा नन्दसिंह बुढा, भौतिक पूर्वाधार तथा सहरी विकास मन्त्रालयमा अम्मरबहादुर थापा, भूमि व्यवस्था तथा कृषि सहकारी मन्त्रालयमा कुर्मराज शाहीलाई नियुक्त गरेका थिए । सामाजिक विकास मन्त्रालयको जिम्मेवारी भने मुख्यमन्त्री आफैले लिएका छन् । 

मुख्यमन्त्री शाहीले मन्त्रीपरिषद् पुर्नगठन गर्ने भएपछि मुख्यमन्त्रीसमक्ष आर्थिक मामिला तथा योजना मन्त्री विमला केसी र आन्तिरिक मामिला तथा कानुन मन्त्री नरेश भण्डारीले राजीनामा पत्र बुझाएका छन् ।