आईपीएलः कलकताको चौँथो जित

काठमाडौँ- इन्डियन प्रिमियर लिग (आईपीएल) मा कलकता नाइट राइडर्सले चौँथो जित हात पारेको छ । बिहीबार राति हैदराबादमा भएको खेलमा कलकताले सनराजर्स हैदराबादलाई ५ रनले पराजित गर्दै कलकताले १० खेलमा चौथो जित हात पारेको हो ।

६ खेलमा पराजय भोगेको कलकताले जम्मा ८ अंक जोडेको छ । यता हैदराबादको भने ९ खेलमा यो छैटौ पराजय हो । उसले ३ खेलमा जित हात पार्दै ६ अंकमात्र जोडेको छ ।

बिहीबार राति १ सय ७२ रनको लक्ष्य पछ्याएको हैदराबादले निर्धारित २० ओभरमा ८ विकेट गुमाएर १ सय ६६ रनमात्र बनाउन सक्यो । उसका लागि कप्तान ऐडेन मार्करामले ४१ रन तथा हेनरिच क्लासेनले ३६ रन बनाए । कलकताका लागि वैभव अरोरा र शार्दुल ठाकुरले समान २-२ विकेट हात पारे ।

यसअघि टस जितेर पहिले ब्याटिङ गरेको कलकताले ९ विकेटको क्षतिमा १ सय ७१ रन बनायो । कलकताका लागि रिंकु सिंहले सर्वाधिक ४६ तथा कप्तान नितिस राणाले ४२ रनको योगदान गरे ।

हैदराबादका लागि मार्को जानसेन र टी नटराजनले २-२ विकेट लिए ।

आईपीएलमा आज राजस्थान रोयल्सले गुजरात टाइटन्सको सामना गर्नेछ ।