लिसंखु पाखरमा सार्वजनिक पदधारण गरेका अभिभावकले बालबालिकालाई अनिवार्य सामुदायिक विद्यालयमा भर्ना गर्नुपर्ने

काठमाडौँ- सिन्धुपाल्चोकको लिसंखु पाखर गाउँपालिकाले आप्‍नो पालिकामा सार्वजनिक पदधारण गरेकाहरूले आफ्‍ना बालबालिका सामुदायिक विद्यालयमा भर्ना गर्न अनिवार्य गरेको छ । गाउँ शिक्षा समितिको निर्णयअनुसार  सार्वजनिक पदधारण गरेकाहरूले आफ्‍ना बालबालिकालाई ७ दिनभित्र सामुदायिक विद्यालयमा भर्ना गर्न सूचना निकालेको छ ।

सामुदायिक विद्यालयहरुलाई थप व्यवस्थित र प्रभावकारी बनाई गुणस्तरीय शिक्षा सुनिश्चितता गर्न सहयोग पुऱ्याउने उद्देश्यले गाउँ शिक्षा समितिको बैशाख १७ गतेको बैठकबाट गाउँपालिकामा सार्वजनिक पदधारण गरेका जनप्रतिनिधि, बहालवाला शिक्षक, कर्मचारी, वि.व्य.स. र शिक्षक अभिभावक संघका पदाधिकारीहरूका बालबालिका सामुदायिक विद्यालयमा भर्ना गराउन निर्णयसहितको सिफारिस भई आएको पालिका अध्यक्ष राजु लामाले जानकारी दिए ।

बैशाख १८ गते गाउँ कार्यपालिकाबाट गाउँ शिक्षा समितिको सिफारिस अनुसार सार्वजनिक पदधारण गरेका सबैको बालबालिका सामुदायिक विद्यालयमा भर्ना गराउने निर्णय भएकाले सूचना प्रकाशित मितिले ७ दिनभित्र अनिवार्य रुपमा सामुदायिक विद्यालयमा भर्ना गराई सो को जानकारी शिक्षा शाखामा उपलब्ध गराइदिन हुन सम्बन्धित सबैको जानकारीका लागि यो सूचना प्रकाशित गरिएको लामाले बताए ।