बुवाले हानेकाे इँटाले लागेर छाेराकाे मृत्यु

प्रतिकात्मक तस्बिर

कैलाली । कैलालीमा बुवाले प्रहार गरेकाे इँटाले लागेर छोराको मृत्यु भएको छ ।  धनगढी उपमहानगरपालिका वडा नं. ६ मट्यारीका ४७ वर्षीय महेश कुमार चौधरीले सामान्य विवादमा इँटा प्रहार गर्दा २१ वर्षीय छोरा अर्जुन चौधरीको मृत्यु भएको हो ।

प्रहरीले खबर पाउनासाथ वडा प्रहरी कार्यालय धनगढी कैलालीबाट प्रहरी निरीक्षक उपेन्द्रबहादुर बमको टोली घटनास्थलमा खटिएको र अनुसन्धानका लागि जिल्ला प्रहरी कार्यालय कैलालीका प्रमुख प्रहरी उपरीक्षक (एसपी) देवेन्द्र बहादुर पाल स्वयं घटनास्थल पुगेका छन् ।

महेशलाई भने नियन्त्रणमा लिइसकेको प्रहरीले जनाएको छ ।

सामुदायिक वनमा रहेको मन्दिरभित्रको शिव भगवानको पूर्ण कदको मुर्ति तोडफोड गरेपछि विवाद उत्पन्न भएको प्रारम्भिक अनुसन्धानबाट खुलेको एसपी पालले बताए । उनले मृतकले मुर्ति तोडफोड गर्न थालेपछि बुवा र छोराको विवाद भएको बताए । पहिला छोराले इँटाले बुबालाई प्रहार गरेपछि बुवाले सोही इँटाले छोरालाई प्रहार गरेपछि अर्जुनकाे घटनास्थल मै मृत्यु भएको उनले जानकारी दिए ।