विराटनगरमा तीन फार्मेसीलाई कारबाही, झापाबाट १३३ अक्सिजन सिलिण्डर बरामद

विराटनगर : महगो मुल्यमा सेनिटाइजर बिक्री गर्ने विराटनगरका तीन वटा फार्मेसी कारबाहीमा परेका छन् । वाणिज्य, आपूर्ति तथा उपभोक्ता संरक्षण कार्यालय विराटनगरले आइतबार बजार अनुगमन गर्ने क्रममा उपभोक्ताबाट बढी मूल्य लिएर सेनिटाइजर बिक्री गरी ठगी गर्ने मोरङको बुढीगंगा २ स्थित टंकिसिनुवारीमा रहेको विज्ञान फार्मेसी, विराटनगर २ स्थित विराट नर्सिङ होम अगाडि सञ्चालित एस फार्मेसी र सोही स्थानमा रहेको बिनुका फार्मेसीलाई जरिबाना गराएको हो । 

विज्ञान फार्मेसीले ८० रुपैयाँमा खरिद गरेको १२० एमएलको रबक्लिन ब्राण्डको सेनिटाइजर उपभोक्तालाई १६५ रुपैयाँमा बिक्री गरेको अनुगमनका क्रममा वाणिज्य कार्यालयले फेला पारेको थियो । उक्त फार्मेसीलाई २ लाख रुपैयाँ जरिवाना गराइएको छ ।

यसै गरी अनुगमनकै क्रममा विराटनगर २ स्थित विराट नर्सिङ होम अगाडि सञ्चालित एस फार्मेसी र सोही स्थानमा रहेको बिनुका फार्मेसीलाई पनि वाणिज्य कार्यालयले जरिवाना गराएको छ । वाणिज्यले एस फार्मेसीलाई पाँच हजार रुपैयाँ र बिनुकालाई २० हजार रुपैयाँ जरिवाना गराएको हो । 

फार्मेसीले मास्क, सेनिटाइजर लगायतका बस्तु खरिद गरेको बिल बिजक दुरुस्त नराखेको भन्दै कार्यालयले जरिवाना गरेको वाणिज्य, आपूर्ति तथा उपभोक्ता संरक्षण कार्यालयका निमित्त प्रमुख सन्तोष पोखरेलले जाानकारी दिए ।

मोटरसाइकल ग्यारेजबाट १३३ अक्सिजन सिलिण्डर बरामद

यसै गरी कोभिड संक्रमितको उपचारका लागि चाहिले अत्यावश्यक अक्सिजन सिलिण्डरको अभाव भइरहेको बेला झापा प्रहरीले भने मोटरसाइकल ग्यारेजमा १३३ वटा सिलिण्डर फेला पारेको छ ।

प्रदेश प्रहरी कार्यालय विराटनगरका अनुसार झापा प्रहरीको सक्रियतामा ग्यारेजबाट १३३ वटा अक्सिजन ग्याँस सिलिण्डर बरामद गरी अक्सिजन रिफिल गर्न सम्बन्धित डिलरलाई बुझाईएको छ ।

गत बुधबारदेखि शनिबारसम्ममा ईलाका प्रहरी कार्यालय दमकले १२ वटा, अनारमनीले ९० वटा, काँकडभिट्टाले १२ वटा र धुलाबारीले १९ वटा गरी जम्मा १३३ वटा अक्सिजन ग्याँस सिलिण्डर जम्मा गरेको हो । जम्मा पारिएका सिलिण्डरहरु रिफिल गर्नको लागि कपुरी ट्रेडर्सलाई १२१ वटा र मातृ ट्रेडर्सलाई १२ वटा जिम्मा लगाईएको जिल्ला प्रहरी कार्यालय झापाले जनाएको छ ।