नागरिक उन्मुक्तिले सुदूरपश्चिमका मुख्यमन्त्री शाहलाई विश्वासको मत दिने, सरकारमा सहभागी नहुने

काठमाडौं– नागरिक उन्मुक्ति पार्टीले सुदूरपश्चिम प्रदेशका मुख्यमन्त्री कमलबहादुर शाहलाई विश्वासको मत दिने भएको छ । उन्मुक्ति पार्टीका नेता लालवीर चौधरीले आफूहरूले मुख्यमन्त्री शाहलाई समर्थन गर्ने जानकारी दिएका हुन् । 

तर, आफूहरू सरकारमा भने सहभागी नहुने उनले बताए । ‘हामी उहाँलाई विश्वासको मत दिन्छौँ, तर हाम्रा मागहरू पूरा नहुँदासम्म सरकारमा सहभागी हुँदैनौँ,’ चौधरीले इकागजलाई भने । 

बर्दिया–२ का प्रतिनिधिसभा सांसदसमेत रहेका चौधरीले आफ्नो पार्टीका माग पूरा गर्न कांग्रेस ​सकारात्मक रहेको उल्लेख गरे । उन्मुक्ति पार्टीले टीकापुर घटनामा दोषी ठहर भइ जेल जीवन बिताइरहेका रेशमलाल चौधरीसहित अन्य राजबन्दीको रिहाइको माग राखिरहेको छ । 

सुदूरपश्चिम प्रदेशका मुख्यमन्त्री शाहले आइतबार विश्वासको मतको प्रस्ताव पेस गर्दैछन् । 

५३ सदस्यीय सुदूरपश्चिम प्रदेशसभामा चाैथाे ठूलो दल नागरिक उन्मुक्ति पार्टीसँग ७ सिट छ भने पहिलाे दल कांग्रेससँग १९ सिट छ । शाहले विश्वासको मत पाउन कम्तीमा २७ सांसदको समर्थन हुनुपर्छ । १० सिट रहेको माओवादी केन्द्रले यसअघि नै मुख्यमन्त्रीमा कांग्रेसका शाहलाई समर्थन गर्ने निर्णय गरिसकेको छ । 

माओवादी केन्द्र र उन्मुक्तिको साथ पाउने भएसँगै आइतबार शाहले विश्वासको मत पाउने पक्का भएको छ ।