बुटवलमा कोभिडले एक घण्टामा तीनसहित चार जनाको मृत्यु

बुटवल : बुटवलस्थित कोरोना विशेष अस्पतालमा एकै रातमा ४ जना उपचाररत कोभिड-१९ संक्रमितको मृत्यु भएको छ । अस्पतालमा उपचाररत ४ जनाको फरक फरक समयमा मृत्यु भएको लुम्बिनी प्रादेशिक अस्पतालले जनाएको छ ।

अस्पतालका अनुसार बैशाख १५ गते भर्ना भएका बुटवल १२ का ४७ वर्षीय पुरुषको गएराति १० बजे मृत्यु भएको थियो भने आज बिहानै १ घण्टाबीचमा ३ जनाको मृत्यु भएको छ । १९ गते अस्पताल भर्ना भएकी कञ्चन गाउँपालिका-४ की २७ वर्षीया महिलाको बिहान ५:४५ बजे मृत्यु भएको छ भने १८ गते भर्ना भएकी बुटवल ९ की ५४ वर्षीया महिलाको बिहान ६:२५मा मृत्यु भएको छ ।

त्यसैगरि बिहीबार भर्ना भएकी तिलोत्तमा ४ की ४० वर्षीया महिलाको बिहान ६:३० बजे मृत्यु भएको लुम्बिनी प्रादेशिक अस्पतालका प्रवक्ता डा. विष्णु गौतमले जानकारी दिए । उनीहरूसँगै रुपन्देहीमा कोभिड संक्रमणबाट मृत्यु हुनेको संख्या २२४ पुगेको छ ।