उत्कृष्ट शौचालय बनाउनेलाई एक लाख २५ हजार पुरस्कार

कैलाली- धनगढी उपमहानगरपालिकाले फरकखाले प्रतियोगिताको आयोजना गरेको छ । जसमा प्रतियोगीले शौचालयको डिजाइन बनाउनुपर्ने छ ।

उपमहानगरपालिकाले बनाउन लागेको शौचालयको उत्कृष्ट डिजाइन बनाउने एक जनाले नगद पुरस्कार समेत प्राप्त गर्ने छन् ।​ उपमहानगरपालिकाका मेयर गोपाल हमालले सार्वजनिक शौचालयको डिजाइन बनाउने मध्ये उत्कृष्ट एक जनालाई एक लाख २५ हजार पुरस्कार दिने बताए ।

उपमहानगरले सार्वजनिक शौचालय निर्माणका लागि नेपाल आर्किटेक्ट इन्जिनियर्स एशोसिएशनसँगको सहकार्य गरेर देशभरका इन्जिनियरलाई आफ्नो डिजाइन पेश गर्न आव्हान गरेको छ। प्रतियोगिताका लागि नेपाल आर्किटेक्ट इन्जिनियर्स एशोसिएशनले २१ दिने सूचना निकालेको छ ।

प्रतियोगितामा पहिलो र दोस्रो हुनेलाई नगद पुरस्कारको व्यवस्था गरिएको उपमहानगरपालिका मेयर हमालले बताए ।

प्रतियोगितामा पहिलो र दोस्रो हुने सार्वजनिक शौचालयको डिजाइनलाई धनगढी उपमहानगरपालिकाले क्रमश १ लाख २५ हजार र ७५ हजार नगद पुरस्कार दिने मेयर हमालले बताए ।

यसरी छनौट भएका डिजाइनका आधारमा धनगढीमा सार्वजनिक शौचालय निर्माण गर्ने तयारी उपमहानगरपालिकाको रहेको छ ।