चिकित्सक र सरकारबीच ६ बुँदे सहमति : आन्दोलनका कार्यक्रम स्थगित (पत्रसहित)

काठमाडौँ- आन्दोलनरत चिकित्सक र सरकारबीच सहमति भएको छ । आइतबार प्रधानमन्त्री कार्यालय सिंहदरबारमा आन्दोलनरत चिकित्सक र सरकारबीच ६ बुँदे सहमित भएको हो । 

वार्तामा चिकित्सक कुटिएको घटनाको समग्र पक्षमा एक हप्ताभित्र छानबिन सम्पन्न गरी दोषीलाई कारबाही गर्ने, घाइते चिकित्सकको उपचारको व्यवस्था सरकारले गर्ने, स्वास्थ्यकर्मी र स्वास्थ्य संस्थाको सुरक्षा व्यवस्थालाई प्रभावकारी कार्यान्वयन गर्ने र चिकित्सक संघले आन्दोलन स्थगित गर्ने सहमति भएको छ ।

शुक्रबार राष्ट्रपति विद्यादेवी भण्डारीको सवारीको क्रममा ट्रमा सेन्ट्रका चिकित्सकमाथि प्रहरीले लाठी चार्ज गरेपछि चिकित्सकहरू आन्दोलित भएका थिए । घटनाको विरोधमा नेपाल चिकित्सक संघले देशभरका अस्पतालमा आकस्मिक बाहेकका सेवा ठप्प गर्ने निर्णय गरेको थियो । 

सरकारसँग सहमति भएसँगै ​चिकित्सकहरू आन्दोलनरत स्थगित गरेर काममा फर्किने भएका छन् । 

चिकित्सकमाथि हातपात गर्ने सुरक्षाकर्मीलाई निलम्बन गरी छानविन सुरु गरेकाले समग्र पक्षमा एक हप्ताभित्र छानविन गरी दोषीलाई कारबाही गर्ने सहमति गरिएको छ ।

त्यस्तै घाइते चिकित्सकको उपचारको व्यवस्था सरकारले गर्ने सहमति गरिएको छ ।

विशिष्ट व्यक्तिको सवारीमा सुरक्षा व्यवस्थापन गर्दा बिरामी एवं आमनागरिक र विशेषगरी स्वास्थ्य संस्था, विद्यालयलगायत संवेदनशील संस्था तथा क्षेत्रहरूमा असहजता नहुने गरी विशिष्ट व्यक्तिहरूको सुरक्षा व्यवस्थापन कार्यविधि २०७७ मा गर्नुपर्ने परिमार्जन सम्बन्धनमा सरकारसमक्ष एक हप्ताभित्रमा सुझाव पेश गर्ने र सरकारले उक्त सुझावहरूलाई यथाशीघ्र कार्यान्वयनमा लैजाने सहमति गरिएको छ ।