मकवानपुरका चार स्थानीय तहमा बिहान ५ बजेदेखि ९ बजेसम्म अत्यावश्यक सामान किन्‍न पाइने

हेटौंडा : मकवानपुरको चार स्थानीय तहमा आजबाट निषेधाज्ञा लागू भएको छ । निषेधाज्ञामा हेटौंडा, थाहा, भिमफेदी र मनहरी गाउँपालिकामामा अत्यावश्यक उपभोग्य बस्तु (दुध, खाद्यान्न, माछा, मासु, फलफुल तथा तरकारी) पसल बिहान ५ बजेदेखि ९ बजेसम्म मात्रै खुल्न दिइएको हो । 

निषेधाज्ञामा औषधी पसल, अक्सिजन सिलिन्डर डिपो, ग्याँस, पेट्रोल पम्प र सवारी साधन मर्मत गर्न तोकिएको वर्कसप मात्रै खुल्ला छन् । अतिआवश्यक सवारीहरु चलेका छन् भने मुख्यराजमार्ग बन्द गरिएको छैन ।  

यस्तै जिल्लामा कोभिड–१९ को कारण पछिल्लो २४ घण्टामा २ जनाको मृत्यु भएको छ । दुवै जना हेटौडा अस्पतालको कोभिड–१९ उपचार कक्षमा उपचाररत थिए । हेटौंडा–१ का ५५ वर्षीय पुरुषको गए राति र बारा जिल्लाका ४६ वर्षीय एक पुरुषको आज बिहान मृत्यु भएको छ । 

हेटौंडा अस्पतालका कोभिड इन्चार्ज सागर काफ्लेका अनुसार उनीहरुको उच्च अक्सिजन र भेन्टिलेटरको सहायतामा उपचार भइरहेको थियो । कोभिड–१९ उपचार कक्षमा अहिले १४ जना गम्भिर संक्रमितको उपचार भइरहेको छ । कोभिड उपचार कक्षमा हाल दुई भेन्टिलेटर राखिएको छ ।