माओवादीतिर लागेकी वलीको 'सांसद पद' के हुन्छ ?

काठमाडौं : दल बदल्ने सांसदहरू भकाभक निस्कासन परिरहेकै बखत लुम्बिनी प्रदेश सभा सांसद बिमला वलीले माओवादी केन्द्र रोजेकी छन् । उनी नेकपाबाट उपनिर्वाचन जितेकी थिइन् । त्यतिखेर एमाले र माओवादी एकीकृत थिए । उनी सूर्य चिन्हबाट चुनाव जितेकी हुन् ।

‘एकीकृत हुँदाका अवस्थामा चुनाव जित्नेको हैसियत के हुन्छ ?’ अवस्था अन्यौलपूर्ण छ । उनलाई निस्कासन गर्न सक्ने या नसक्ने विषय राजनीतिक र कानुनी बहसको विषय बनेको छ । वलीले दाङ ३ (ख) बाट उपनिर्वाचन जितेकी थिइन् ।

‘हामी त्यो विषयमा हामी कन्फ्युजनमा छौं’ प्रमुख निर्वाचन आयुक्त दिनेशकुमार थपलियाले इकागजसँग भने, ‘त्यो विषयमा अदालतले केही बोलेको छैन । अर्काे त, निर्वाचन आयोगलाई त्यो विषयमा हेर्ने अधिकार पनि छैन । त्यो त संसद र सभामुखले नै निर्णय लिने विषय हो । आयोगलाई पद खालि भएपछि मात्रै जानकारी आउने हो । खालि भएका ठाउँमा निर्वाचन गराइदिनेसम्म हो ।’

नेकपा बनिसकेपछि तीनै तहमा उपनिर्वाचनका आधारमा जनप्रतिनिधि बनेका थिए । आयोगका अनुसार, प्रतिनिधि सभामा एक, राष्ट्रिय सभामा १६, प्रदेश सभामा १ र स्थानीय तहमा ३२ जनाले नेकपाको नामबाट चुनाव जितेका छन् । नेकपाको सूर्य चिन्हबाट विजयी भएकाहरूको हकमा दलीय हैसियतमा समस्या सिर्जना भएको हो ।