आन्तरिक उडानका लागि निगमले थप विमान खरिद गर्नुपर्छ : कार्यकारी निर्देशक अधिकारी

फाइल तस्बिर

काठमाडौँ- नेपाल वायुसेवा निगमका कार्यकारी निर्देशक युवराज अधिकारीले आन्तरिक उडानका लागि थप विमान किन्नुपर्ने बताएका छन् ।

सोमबार नयाँ पर्यटनमन्त्री सुदन किराँतीलाई स्वागत गर्न आयोजित कार्यक्रममा बोल्दै कार्यकारी निर्देशक अधिकारीले निगमलाई सबैभन्दा पहिला आन्तरिक रूपमा बलियो बनाउनका लागि आन्तरिक उडानका लागि विमानहरू थप्न आवश्यक रहेको बताएका हुन् । उनले वायुसेवा निगमलाई सक्षम र सुदृढ बनाउने गरी कार्ययोजना बनाइरहेको उल्लेख गरे ।

निगमले सेवा विस्तार गर्दा नाफा नोक्सानको भन्दा पनि राष्ट्रिय दायित्व पूरा गर्नुपर्ने जिकिर गरे । अधिकारीले निगमको हवाई क्षेत्रमा हुने उपस्थितिले बजार व्यवस्थापनलाई नियन्त्रण गर्ने बताए । उनका अनुसार निगमको आर्थिक अवस्थाले ३ वटासम्म विमान किन्नसक्ने भएकाले निगम आन्तरिक उडानका लागि जहाज थप्ने तयारीमा रहेको भन्दै सञ्चालक समिति र मन्त्रालयको निर्देशन हुनासाथ अगाडि बढ्न निगम तयार रहेको छ ।

उनले निगमको प्राथमिकता यात्रुको सेवामा गुणस्तरीयता बढाउने र निगमको सुधारमा तीब्रता ल्याउनु रहेको बताए । राज्यले राष्ट्रिय ध्वजावाहकलाई संरक्षण गर्न आवश्यक रहेको उनकाे भनाइ छ ।

अधिकारीले निगमको वित्तीय पुनःसंरचना नगरिएसम्म निगममा आमुल परिवर्तन हुनसक्ने अवस्था नभएको बताए ।