पीएम कप क्रिकेटः बागमतीको सान्त्वना जित

काठमाडौँ- बागमती प्रदेशले पीएम कप महिला टी-ट्वान्टी राष्ट्रिय क्रिकेट प्रतियोगितामा सान्त्वना जित हात पारेको छ । सुनसरीको इटहरीस्थित जनता क्रिकेट पार्कमा बुधबार समूह ‘ए’ अन्तर्गतको अन्तिम खेलमा गण्डकी प्रदेशलाई ३७ रनले पराजित गर्दै बागमतीले पहिलो जितसँगै प्रतियोगिताको अन्त्य गरेको हो ।

गण्डकीले भने तीनवटै खेलमा पराजय भोग्यो । यस समूहबाट सुदूरपश्चिम प्रदेश र नेपाल एपीएफ क्लब सेमिफाइनलमा प्रवेश गरे ।

बुधबार १ सय ३६ रनको लक्ष्य पछ्याएको गण्डकीले निर्धारित २० ओभरमा ५ विकेट गुमाएर ९८ रन जोड्यो । गण्डकीका लागि श्रृष्टि जैसीले ३४ तथा सिमाना केसीले ३६ रन बनाए । बागमतीका लागि अस्मिना कर्माचार्यले ३ विकेट हात पारिन् ।

यसअघि टस जितेर पहिले ब्याटिङ गरेको बागमतीले निर्धारित २० ओभरमा ५ विकेट गुमाएर १ सय ३५ रन जोड्यो । बागमतीका लागि कन्चन श्रेष्ठले ५२ बलमा ९ चौकासहित सर्वाधिक ५६ रन जोडिन् । अस्मिना कर्माचार्यले १८ रन बनाइन् ।

गण्डकीका लागि कुसुम गोदार, श्रृष्टि जैसी, निरुता जिटी र सिमाना केसीले एक-एक विकेट लिए ।