पोखरा विमान दुर्घटना : लयमा फर्किँदै गरेको पर्यटन क्षेत्रमा ठूलो धक्का

काठमाडौँ- पोखरामा भएको यति एयरलाइन्सको विमान दुर्घटनाले पर्यटन क्षेत्रमा ठूलो धक्का पुर्‍याएको छ । पोखराको सेती खोँचमा भएको विमान दुर्घटनामा चार जना चालकदलका सदस्यसहित ७२ जनाकै मृत्यु भएको छ ।

मृत्यु हुनेमा १५ जना विदेशी पनि छन् । जो नेपाल घुम्न आएका पर्यटक पनि हुन् । पाँच जना भारतीय पर्यटकको पनि मृत्यु हुनुले नेपाल फेरि एकपटक घुम्नलाई सुन्दर भए पनि हवाई सुरक्षा धेरै असुरक्षित रहेको तथ्य उजागर गरिदिएको छ ।

नेपाल घुम्न आएकी रुसकी एलिना बन्दुरोले नेपाल घुम्न जाऔँ पोस्ट इन्स्टाग्राममा शेयर गरेकी थिए । विमान चढेको फोटो र नेपालको सुन्दर माछापुच्छ्रे हिमालको फोटो हाल्दै उनले इन्स्टाग्राममा नेपाल घुम्न जाउँ लेखेकी थिइन् । तर त्यो लेखेको चौबिस घण्टा नबित्दै उनले पोखरामा भएको विमान दुर्घटनामा ज्यान गुमाइन् । यसले एलिना र उनको परिवार मात्रै होइन, रुसमा रहेका धेरै मानिसलाई नेपालको हवाई यात्रा असुरक्षित भएको सन्देश दिएको छ ।

पोखरा अन्तर्राष्ट्रिय विमानस्थल उद्घाटन भएको दुई हप्तामा पोखरामै भएको यो दुर्घटनाले नेपाली आकाश असुरक्षित मात्रै होइन, इयूको कालोसूचीमा रहनु वाास्तविक रहेको तथ्य पनि फेरि एकपटक बहसमा आएको छ ।

दुर्घटना हुन लागेको जहाजबारे कुनै पनि कारण नखुली सेती खोँचमा भएको विमान दुर्घटनाले भूकम्प र कोभिड महामारीपछि विस्तारै लयमा आएको पर्यटन क्षेत्रलाई ठूलो धक्का पुगेको छ । 

आन्तरिक पर्यटनलाई खासै असर नगर्ने भएपनि नेपाल आउने विदेशी पर्यटक यो विमान दुर्घटनाबाट झस्किने अनुमान गर्न सकिन्छ । विमान दुर्घटनामा आफ्ना नागरिक गुमाएपछि चीन, अमेरिका लगायतका देशले पनि दुःख व्यक्त गरेका छन् । 

यसले अन्तर्राष्ट्रिय सञ्चारमाध्यमलले नेपाल घुम्न विश्वकै उत्कृष्ट गन्तव्यमा नेपालका विभिन्न ठाउँ राख्ने भए पनि आन्तरिक हवाई सुरक्षा विश्वसनीय नभएको तथ्य सतहमा ल्याउन सक्छन् । यसले नेपाल आउने पर्यटकलाई मानसिक रुपमा असर गर्न सक्ने र आफ्नो नेपाल भ्रमणबारे पुनर्विचार गर्न सक्ने पनि आँकलन गर्न सकिन्छ । यसबाट केही सयमदेखि उत्साहित पर्यटन व्यवसायी भने निराश छन् ।

अन्तर्राष्ट्रिय विमानस्थल बनेपछि पोखराका पर्यटन व्यवसायी धेरै उत्साहित थिए । तर यो विमान दुर्घटनाले उनीहरू धेरै दुःखी छन् । अनेक विवादबीच विमानस्थल उद्घाटन हुँदा धेरै शंका उपशंकाहरू चलिरहेकै थिए । तर पनि उनीहरू खुशी थिए ।

त्यो खुशी राम्ररी मनाउन नपाउँदै पोखरामा भएको अहिलेसम्मकै ठूलो एटीआर विमान दुर्घटनाले उनीहरूलाई निराश बनाएको छ । यो निराशा फेरि खुशीमा फर्काउन धेरै ठूलो मूल्य चुकाउनुपर्ने हुन सक्छ । कोभिडपछि नयाँ वर्षमा पर्यटन राम्रै फस्टाउने अनुमान गरिएको थियो । सोही अनुसार विदेशी पर्यटकको संख्या पनि बढिरहेको थियो । तर सोच्नै नसकिएको विमान दुर्घटनाले पर्यटन व्यवसायी चिन्तित बनेका छन् ।

पोखरा विमान दुर्घटनापछि दुःखी भएका नाट्टाका अध्यक्ष रमेश थापाले नेपालको हवाई सुरक्षा र पर्यटन क्षेत्रको आशाका रुपमा हेरिएको अन्तर्राष्ट्रिय उडान सुरक्षित बनाउन माग गरेका छन् । पर्यटन क्षेत्रलाई यसले ठूलो धक्का दिएको भन्दै यस किसीमका दुर्घटना न्युनिकरणका लागि ठोस कदम चाल्नुपर्ने उनको भनाई छ । आगामी दिनमा हवाई दुर्घटना न्यूनीकरणका लागि सरकारले ठोस कदम नचाल्ने हो भने यसले नेपालको हवाई क्षेत्र र पर्यटन झन् ठूलो क्षति गर्ने पनि निश्चित छ ।

त्यसैले सरकारले विमान दुर्घटनापछि शोक बिदा होइन, यो दुःख र पीडालाई शक्तिमा बदल्न हवाई दुर्घटना न्युनिकरणका लागि ठोस कदम चाल्न ढिलाई गर्नु हुँदैन ।