१८ दिनदेखि हराएका भरतको शव गाडेको अवस्थामा भेटियो

सांकेतिक तस्बिर

कैलाली- विगत १८ दिनदेखि बेपत्ता डडेल्धुराको आलीताल गाउँपालिका–८ डाँडाखर्कका ८ वर्षीय बालक भरत बोहोराको शव माटोमुनी गाडेको अवस्थामा फेला परेको छ । प्रहरीले शंकास्पदस्थल उत्खनन गरेर बालकको शव निकालेको हो ।

बालक बोहरा गत १२ पुसदेखि घरपरिवारको सम्पर्कमा थिएनन् । उनको परिवारले समेत उनी हराएको भन्दै प्रहरीलाई समेत जानकारी दिएका थिएनन् । पुस २७ गते स्थानीयले प्रहरीलाई बालक सम्पर्कमा नरहेको बताएका पछि प्रहरीले अनुसन्धान सुरु गरेको थियो ।

बालकका बुबा रोजगारीका लागि घर बाहिर छन् । घरमा आमा, सौतेनी आमा र एक जना उनका दाइ छन् । घर परिवारबाटै उनको हत्या भएको हुन सक्ने भन्दै प्रहरीले दुवै आमालाई नियन्त्रणमा लिएर अनुसन्धान शुरु गरेको ईलाका प्रहरी कार्यालय जोगबुढाका प्रहरी निरीक्षक गंगादत्त बडुले बताए ।