नेपाल सुप लिगः उस्तै निरस देखिए काठमाडौँ र पोखरा

काठमाडौँ: नेपाल सुपर लिगमा शुक्रबार आमने सामने हुनु अगाडि काठमाडौँ रेजर्स र पोखरा थन्डर्सले उस्तै लय देखाएका थिए । नतिजाका हिसाबले दुई टिमको स्तरमा खासै फरक देखिएको थिएन । तीनै दुई टिम एकआपसमा भिड्दा नतिजा बराबरी निस्कियो । 

दशरथ रंगशालामा एनएसएलको तेस्रो चरण चलिरहँदा भिडेका दुई टिमले गोलका अवसर सिर्जना नगरेका होइनन् । तर दुबै टिमको अग्रपंक्तिले निरस खेल देखाउँदा गोल भएन । पहिलो हाफमा बल पोसेसनमा हैकम जमाएको पोखराको कप्तानी सम्हालेका स्ट्राइकर नवयुग श्रेष्ठ विपक्षीको क्षेत्रमा चल्न सकेनन् । न त पोखराका विदेशीलगायतका अन्य खेलाडी नै जोशिला देखिए । 

पछिल्लो खेलमा धनगढी एफसीसँग तीन गोल खाएको काठमाडौँले पहिलो हाफमा पोखराविरुद्ध सम्‍झनलायकको आक्रमण बुन्न सकेन । तर दोस्रो हाफमा काठमाडौँले अग्रपंक्तिमा सुधारिएको खेल देखायो । तर गोल निस्केन । 

यसअघि एनएसएलमा एक-एक जित दर्ता गरेका पोखरा र काठमाडौँले शुत्रलबारको बराबारी पछि समान अंक बनाएका छन् । र, तालिकामा क्रमशः तेस्रो र चौँथो स्थानमा छन् ।