१७ किलोमिटर सडक कालोपत्रेदेखि भेडापालक कृषकलाई भत्तासम्म

सुर्खेत- कर्णाली सरकारले १४ महिना अवधिमा १७ किलोमिटर सडक कालोपत्रे गरेको छ । मुख्यमन्त्री जीवनबहादुर शाहीले आज आफ्नो १४ महिने कार्यकालमा गरेका कामहरूको विवरण सार्वजनिक गर्दै यस्तो जानकारी गराएका हुन् ।

मुख्यमन्त्री शाहीका अनुसार एक सय १३ किलोमिटर सडक ग्राभिल र ६ सय २२ किलोमिटर कच्ची सडक निर्माण भएको छ । यस अवधिमा अवधिमा १३ वटा झोलुङ्गे पुल, ८ वटा सडक पुल निर्माण सम्पन्न भएका छन् । १ हजार ५ सय ७१ वटा जनता आवास र १ सय १ वटा विपन्नका घर निर्माण सम्पन्न भएका छन् । ७ वटा सडक आयोजनालाई बहुवर्षीय ठेक्का सम्झौता गरी निर्माण गर्न अगाडि बढाइएको शाहीले बताए ।

उनले आफ्नो कार्यकालमा ‘६ ब’ को कार्यान्वयन भएको बताएका छन् । पाँच वर्षअघि कर्णाली प्रदेशसभामा कर्णालीको विकास र समृद्धिका लागि ‘६ ब’ (वन, बाटो, बजार, बिजुली, विचार र व्यवस्थापन) को वकालत गर्दै आएका शाहीले आफू मुख्यमन्त्री भएपछि यसलाई सरकारको नीति, कार्यक्रम र बजेटमा समावेश गरेका थिए ।

दक्षिणको भारतसँग सीमा नजोडिएको कर्णालीलाई उत्तरको चीनसँग जोड्ने कर्णाली र भेरी करिडोरका लागि आवश्यक बजेटका लागि नीतिगत निर्णय समेत गरेका छन् ।

प्रदेश सरकारले डोल्पाको जगदुल्ला हाइड्रोपावर कम्पनीमा ११ करोड ७१ लाख ५० हजार शेयर लगानी गरेको छ । डोल्पाकै ७५० किलोवाटको आँखुलेखोला जलविद्युत् आयोजनामा प्रदेश सरकारले १० प्रतिशत लगानी गरेको छ भने दैलेखको पराजुली खोलामा निर्माण भइरहेको ४ मेगावाटको रारा हाइड्रोपावरमा ५ करोड प्रदेश सरकारबाट शेयर लगानी गर्ने प्रतिबद्धता गरिएको छ ।

‘कर्णालीको विकास र समृद्धिका लागि आन्तरिक आम्दानी बढाउन आवश्यक छ, यसका लागि विद्युतमा लगानी उपयुक्त अवसर हो,’ शाहीले भने ।

प्रदेश सरकारले ३ सय ९४ जनालाई विभिन्न छात्रवृत्ति कार्यक्रममार्फत समेटेको जनाएको छ । मुख्यमन्त्री शाहीले छोरी–बुहारी, उच्च शिक्षा जेहेन्दार, उच्च शिक्षा अपाङ्ग, उच्च शिक्षा दलित, द्वन्द्वपीडित, शहिद सन्तति छात्रवृत्ति कार्यक्रममार्फत १४ महिनाको अवधिमा ३ सय ९४ जनालाई छात्रवृत्ति दिइएको बताए ।

यस्तै कर्णालीमा विद्यमान प्राविधिक जनशक्तिको न्यूनतालाई सम्बोधन गर्न र कर्णालीवासी विद्यार्थीलाई प्राविधिक उच्च शिक्षाको छात्रवृत्तिको अवसर उपलब्ध गराउन १० जना चिकित्सक र अन्य प्राविधिक क्षेत्रका ६० जना अध्ययनरत विद्यार्थीलाई अध्ययन पश्चात कर्णालीमा न्यूनतम दुई वर्ष काम गर्ने गरी प्राविधिक उच्च शिक्षा छात्रवृत्ति उपलब्ध गराइएको उनले जानकारी दिए ।

उनले स्वास्थ्यका सूचकहरूमा पनि उल्लेख्य सुधार गरेको बताए । मुख्यमन्त्री शाहीले आफ्नो कार्यकालमा प्रदेश जनस्वास्थ्य प्रयोगशालाको स्थापना र सञ्चालन गरिएको जनाए ।

सुर्खेतको भेरीगङ्गा नगरपालिकको छिन्चुमा प्रादेशिक सरुवा रोग अस्पताल निर्माणका लागि राष्ट्रिय वन क्षेत्र प्रयोग गरे वापत लाग्ने २ करोड, ८९ लाख ५० हजार २ सय ४० रुपैयाँ प्रदेश सरकारले उपलब्ध गराएको जानकारी दिए ।

प्रदेश सरकारले यो अवधिमा भेडा पालकलाई प्रोत्साहन स्वरूप ६४ लाख रुपैयाँ भत्ता उपलब्ध गराएको छ ।

पत्रकार सम्मेलनमा मुख्यमन्त्री शाहीले ५० भन्दा बढी भेडा पाल्ने कृषकहरू मध्येबाट ३ सय ५७ जनालाई भेडापालक कृषक भत्ता उपलब्ध गराइएको जानकारी दिए ।