नेपाल टी-ट्वान्टीः विराटनगर फाइनलमा, लुम्बिनीको सामना गर्ने

काठमाडौँ- विराटनगर सुपर किंग्स नेपाल टी-ट्वान्टी क्रिकेट लिगको फाइनलमा प्रवेश गरेको छ । त्रिवि क्रिकेट मैदानमा मंगलबार भएको दोस्रो क्वालिफायर खेलमा जनकपुर रोयाल्सलाई ३९ रनले पराजित गर्दै विराटनगर फाइनलमा प्रवेश गरेको हो ।

अब बुधबार हुने फाइनलमा विराटनगरले लुम्बिनी अल स्टार्सको सामना गर्नेछ । लुम्बिनीले यसअघि पहिलो क्वालिफायरमा जनकपुरलाई नै पराजित गर्दै फाइनलमा प्रवेश गरेको थियो ।

मंगलबारको खेलमा १ सय ६८ रनको लक्ष्य पछ्याएको जनकपुरले १९ ओभर १ बलमा सबै विकेट गुमाउँदै १ सय २८ रन मात्र जोड्यो । जनकपुरका लागि चाडविक वाल्टनले सर्वाधिक ५१ रन तथा कप्तान ट्रेभोन ग्रिफिथले ३४ रन बनाए ।

विराटनगरका केयोन जोसेफले सर्वाधिक ३ विकेट लिए । नन्दन यादव र राज नननले २-२ विकेट हात पारे ।

यसअघि टस जितेर पहिले ब्याटिङ गरेको विराटनगरले निर्धारित २० ओभरमा ६ विकेट गुमाएर १ सय ६७ रन जोड्यो । विराटनगरका लागि गौरान्शु शर्माले सर्वाधिक ४२ रन बनाए ।

अर्जून साउदले ३५, राज नननले ३३ तथा हुसेन तलतले ३१ रनको योगदान गरे । जनकपुरका लागि जितेन्द्र मुखियाले शराफुदिन असरफ, ललित राजवंशी र सामिउल्लाह शिनवारीले एक-एक विकेट हात पारे ।