सुशासन र सेवा प्रवाह प्रतिबद्धता गरेकाले हामी सरकारलाई विश्वास गर्छौं : लिङ्देन

काठमाडौँ– राष्ट्रिय प्रजातन्त्र पार्टीका अध्यक्ष राजेन्द्र लिङ्देनले सरकारले विगतबाट पाठ सिक्दै सुशासन र सेवा प्रवाहमा प्रतिबद्धता जनाएका कारण सरकारलाई विश्वसको मत दिने निर्णय गरेको बताएका छन् ।

मंगलबार प्रधानमन्त्री पुष्पकमल दाहाल ‘प्रचण्ड’ले मागेको विश्वासको मतको प्रस्तावको छलफल गर्ने क्रममा अध्यक्ष लिङ्देनले यस्तो बताएका हुन् ।

‘त्यो संसदीय संरचनाको गम्भीरतालाई त्यो जनादेशलाई आत्मसाथ गरेर राष्ट्रिय प्रजातन्त्र पार्टीले प्रारम्भमै प्रधानमन्त्रीमा पुष्पकमल दाहाललाई प्रधानमन्त्री गर्नेमा हस्ताक्षर गरेको छ,’ उनले भने, ‘सुशासन र सेवा प्रवाहमा जुन प्रतिबद्धताहरू व्यक्त भएका छन् त्यसमा राष्ट्रिय प्रजातन्त्र पार्टी विश्वास गर्छ ।’

यो पटकको प्रतिनिधिसभाको प्रकृति नै विशेष खालकाे भएकाले पनि सरकारमा सहभागी भएको उनको भनाइ  छ ।

‘यस पटकको प्रतिनिधि सभाको प्रकृति नै विशेष प्रकृतिको छ,’ उनले भने, ‘कुनै पनि राजनीतिक दलको बहुमत छैन । सबै राजनीतिक दलहरू मिलेर जानुपर्ने कुनै विचारलाई पनि निषेध गरिएको छैन । दललाई पनि निषेध गरिएको छैन ।’

अध्यक्ष लिङ्देनले पुष २७ गते बिदा दिने सरकारको निर्णयलाई समेत स्वागत गरे ।