हामीलाई समस्याहरू केलाएर बस्ने छुट छैन, समाधानतिर बढौँ : प्रधानमन्त्री ‘प्रचण्ड’

काठमाडौँ–प्रधानमन्त्री पुष्पकमल दाहाल प्रचण्डले अहिलेको सरकारलाई  समस्याहरू केलायएर बस्ने छुट नभएको बताएका छन् । सोमबार प्रतिनिधि सभाको पहिलो बैठकमा आफ्नो मन्तव्य राख्दै प्रधानमन्त्रीले समस्या केलाएर बस्ने भन्दा समाधानको सुत्र खोज्नतिर लाग्नुपर्ने बताए ।

‘भर्खरै हामी जनताकाबीचबाट आएका छौँ,’ उनले भने, ‘त्यसैले जनताका गुनासा, चासोलाई अत्यन्त नजिकबाट नियालेका छौँ । हामीलाई समस्याहरू केलाएर बस्ने छुट छैन । समाधानको सुत्र खोज्ने तिर लाग्नुपर्छ । समाधानतिर अगाडि बढ्नु छ ।’

उनले फरक फरक पृष्ठभूमिबाट आएका दलहरू भएता पनि सुशासन र समृद्धिकोका  सवालमा  साझा प्रतिबद्धताहरू रहेको बताएका  छन् । ‘हामी फरक फरक पृष्ठभूमिबाट आएका छौँ,’ प्रधानमन्त्री प्रचण्डले भने, ‘तर जनतासँगको सुशासन र समृद्धिको सवालमा हाम्रा प्रतिबद्धताहरू साझा रहेका छन् । मलाई विश्वास छ हामी प्रतिक्रियको होइन क्रियको राजनीति गर्ने छौँ ।’

उनले निर्वाचनबाट आएका नयाँ दललाई पनि स्वागत गरे । ‘यसपटक यो पटक प्रतिनिधिसभामा नयाँ दलहरूको प्रवेश भएको छ,’ उनले भने, ‘तपाईंहरूको प्रवेश लोकतन्त्र र सम्प्रभुताको जित हो ।’