‘फास्ट एन्ड फ्युरियस ९’ ले ल्यायो प्रचारको नयाँ काइदा

लसएन्जल्स : ‘फास्ट एन्ड फ्युरियस’ को नवौं शृंखला जुन २५ मा रिलिज हुने तरखरमा छ । यही वर्षको अप्रिल १ मा रिलिज हुने घोषणा गरेको फिल्म सरेर जुनमा पुगेको हो । जुनबाट पनि यो फिल्म सर्ला कि भन्ने आशंका बढेका बेला फिल्मले प्रचार थालेको छ ।

तर, फिल्मले दर्शकसँग प्रत्यक्ष उपस्थित भएर फिल्मको प्रचार गर्न अप्ठेरो हुने अवस्थालाई ख्याल गर्दै पडकास्टमार्फत् फिल्मको प्रचार गर्ने भएको छ । युनिभर्सल पिक्चरले वितरण गर्न लागेको फिल्मले आज अर्थात् शुक्रबार यसको पहिलो भाग प्रसारण गर्ने भएको छ । वितरण कम्पनी एनबिसी युनिभर्सलले पडकास्ट ९ भागको रहने जनाउँदै पहिलो भागमा भिन डिजेलसँगको कुराकानी रहने जनाएको छ । 

आजबाट सुरु भएको पडकास्ट हरेक दिन शुक्रबार प्रसारण हुनेछ । यो शृंखला फिल्मको रिलिज नहुन्जेलसम्म चलिरहनेछ । पडकास्टमा कलाकारले ‘फास्ट एन्ड फ्युरियस’सँग जोडिएका अनुभव र फिल्मको जानकारी सेयर गर्नेछन् । 

जस्टिन लीको निर्देशन रहेको फिल्ममा माइकल रोड्रिगेज, रेसे गिब्सन, जोरदाना ब्रिउस्टर, क्रिस ब्रिजेज, नाथलाइ इम्मानुएल, हेलेन मिरेन र चार्लिज थेरोनको अभिनय छ । पडकास्टमा यी कलाकारसँगै प्राविधिकसँगको कुराकानीमा पनि सामेल रहनेछ । यो फिल्म दक्षिण कोरिया, ताइवान र हङकङतिर मे १९ मा रिलिज हुनेछ भने अमेरिकमा भने जुन २५ मा रिलिज हुनेछ ।