दार्चुलामा ट्याक्टर दुर्घटना हुँदा चालकको मृत्यु

दार्चुला– दार्चुलामा ट्याक्टर दुर्घटना हुँदा चालकको मृत्यु भएको छ । जिल्लाको व्याँस गाउँपालिका-५ धौलाकोटमा ट्याक्टर दुर्घटना हुँदा सोही पालिकाको २ नम्बर वडाका हिकिलाका ४३ वर्षीय लोकेन्द्रसिंह बडालको मृत्यु भएको जिल्ला प्रहरी कार्यालयका दार्चुलाका प्रहरी निरीक्षक गोविन्दप्रसाद भण्डारीले बताए । 

म १ त १११८ नम्बरको ट्याक्टर साहुसमेत रहेका बडाल आफैले चलाउँदा शुक्रबार राति दुर्घटनामा परेको र उनको घटनास्थलमै मृत्यु भएको प्रहरीले जनाएको छ । ट्याक्टर सडकबाट करिब एक सय मिटर तल खसेको छ । घटनाको विस्तृत जानकारीका लागि प्रहरीको टोली घटनास्थलतर्फ खटिएको प्रहरी निरीक्षक भण्डारीले बताए ।