कार्मको ‘अनन्त’ र प्रदीपको ‘प्रकाश’ प्याक अप

काठमाडौं  : अभिनेता कार्म र लक्ष्मी बर्देवाको अभिनय रहेको ‘अनन्त’ले सुटिङ प्याकअप भएको जनाएको छ । निर्माता नवविजय श्रेष्ठले निर्धारित समयमा नै फिल्मको सम्पूर्ण सुटिङ सकाएको बताए । यो फिल्म २० दिनमा सुटिङ सक्ने लक्ष्यसहित फ्लोरमा गएको थियो । 

टाइम ट्राभल लभस्टोरी विधाको यो फिल्मलाई जेसन लोप्चनले निर्देशन गरेका हुन् । अस्कर फिल्म कलेजबाट ग्रयाजुएसन गरेका उनले केही लघु फिल्मको निर्देशन गरेका छन् । फिल्मले प्रेमका लागि हदसम्म जाने चरित्रको कथा पेस गर्नेछ ।

जेसनकै कथा रहेको फिल्मलाई बबिन दुलालले खिचेका हुन् । फिल्मलाई नवविजय श्रेष्ठले निर्माण गर्न लागेका हुन् । उनलाई निर्माणमा सह निर्माताको रुपमा रन्जन ढुंगाना र शीतल खड्काले सघाउनेछन् भने तेजबहादुर श्रेष्ठ र दीपेश राउत सहायक निर्माताको रुपमा रहनेछन् ।

रेमन मल्ल र सल्लेन सुवाल लाइन प्रोड्युसरको भूमिकामा रहेका छन् । फिल्म किपालय प्रडक्सनको ब्यानरमा बनेको हो ।यसैगरि प्रदीप खड्काको अभिनय रहेको ‘प्रकाश’ले पनि सुटिङ सकाएको जानकारी गराएको छ । जुम्लामा सुटिङ भइरहेको यो फिल्म ४२ दिन खिचिएको निर्माण टिमले जनाएको छ । 

दिनेश राउतको निर्देशन रहेको चलचित्रमा रेणु योगी, दिया मास्के, प्रकाश घिमिरे, राजन खतिवडा, रामबाबु रेग्मी, निरज पन्थी, हुम बीसी लगायतका कलाकारको पनि अभिनय छ । विनिश इन्टरटेन्मेन्टको ब्यानरमा निर्माण भएको चलचित्रमा महेन्द्र अधिकारीको लगानी छ । राजेश श्रेष्ठको छायांकन रहेको चलचित्रमा विकास सुवेदीको लेखन रहेको छ ।