‘निषेधाज्ञा’मा घरभित्रै कसरी रमाउने ?

काठमडौँ : आजबाट सरकारले निषेधाज्ञा जारी गरेको छ । अत्यावश्यक कामबाहेक घरबाहिर निस्किन बन्देज छ । कोभिड-१९ लाई ध्यानमा राखेर कार्यालयहरूले ‘वर्क फ्रम होम’ सुरु गरिसकेका छन् । व्यापार व्यवसाय ठप्प छन् । स्कुल र कलेज बन्द छन् । अभिभावकदेखि बालबालिका सबै घरभित्र थुनिएका छन् ।

यस्तो अवस्थामा मानिसलाई तनाब र चिन्ताले सताउँछ । ऋण काढेर व्यवसाय गर्नेलाई व्यवसाय डुब्‍ने चिन्ता हुन्छ । जागिरेलाई जागिर गुम्ने तनाब हुन्छ । चिन्ता र तनाब भगाउन होस् वा समय कटाउने बहानामा मानिसहरू जाँडरक्सी र चुरोटको लतमा पर्ने सम्‍भावना हुन्छ । यस्ता लतले रोगप्रतिरोधात्मक क्षमता कमजोर बनाउने भएकाले यस्तो लतबाट टाढा बस्‍नुपर्छ ।

बाहिर निस्किने, रमाइलो गर्ने, साथीभाइसँग भेटघाट गर्ने खालका दैनिकीबाट एक्कासि घरभित्र बस्नुपर्दा अप्ठ्यारो महसुस हुन्छ । के गरौँ न कसो गरौँ हुन्छ । मोबाइल, ट्याब, ल्यापटपजस्ता ग्याजेटको लत पनि मानिसलाई यही बेला लाग्छ । बाहिरफेर निस्किन नपाउँदा स्क्रिनमै घोत्लिरहने बानी धेरैलाई पर्छ । यसले अनिद्राको समस्या दिम्त्याउँछ । 

के गर्ने, कसरी रमाउने ?
- गीत सुन्‍ने, फिल्म हेर्ने, किताब पढ्ने 
- घरभित्रै गर्न सकिने ध्यान, योग र व्यायाम गर्ने 
- गलत सूचनाको महामारीबाट टाढा बस्‍ने । तथ्यहीन र भ्रामक सूचनाको पछि नलाग्‍ने । 
- विश्व स्वास्थ्य संगठन, स्वास्थ्य तथा जनसंख्या मन्त्रालयको सूचना र आधिकारिक समाचारमाध्यमका समाचार सामग्री मात्रै पढ्ने, हेर्ने 
- कुलतमा लागेकाले यो समयलाई अवसरको रूपमा लिएर कुलत त्याग्‍न गर्न सकिन्छ 
- अरुबेला घरभित्रकै सदस्यसँग सञ्चार हुन पाउँदैन । यो मौका छोपेर परिवारसँग ‘क्‍वालिटी टाइम’ बिताउन सकिन्छ 
- इनडोर गेम खेल्ने, शारीरिक व्यायाम गर्ने
- सामाजिक सञ्जालमा साथीहरूको समूह बनाएर विभिन्‍ने विषयमा छलफल गर्ने 
- साथीभाइसँग भिडियो च्याट गरेर आफ्ना अनुभव सुनाउने, उनीहरूका अनुभव सुन्‍ने