२०२४ को टी-ट्वान्टी विश्वकप फरक फर्म्याटमा हुने

काठमाडौँ- सन् २०२४ मा अमेरिका र वेस्ट इन्डिजमा संयुक्त रुपमा आयोजना हुने आईसीसी टी-ट्वान्टी क्रिकेट विश्वकप फरक फर्म्याटमा आयोजना हुने भएको छ ।

आईसीसीले २०२४ को विश्वकप यसै वर्ष अस्ट्रेलियामा आयोजना भएको भन्दा फरक फर्म्याटमा आयोजना हुने जनाएको हो ।

आईसीसीले जनाए अनुसार प्रतियोगितामा सहभागी २० टिमलाई ५-५ टिम गरी विभिन्न चार समूहमा विभाजन गरिनेछ । त्यसपछि चारवटै समूहका शीर्ष दुई टिम सुपर ८ चरणमा प्रवेश गर्नेछ ।

सुपर ८ मा प्रवेश गरेका टिमलाई ४-४ टिम गरी पुनः दुई समूहमा विभाजन गरिनेछ । त्यसपछि समूह विजेता र उपविजेता टोलीहरु सेमिफाइनलमा प्रवेश गर्नेछन् ।

विश्वकप खेल्ने २० टिममध्ये १२ टिमको टुंगो लागिसकेको छ । वेस्ट इन्डिज र अमेरिका आयोजकको नाताले विश्वकपमा स्थान बनाइसक्दा अस्ट्रेलिया, इंग्ल्यान्ड, भारत, नेदरल्यान्ड्स, न्यूजिल्यान्ड, पाकिस्तान, दक्षिण अफ्रिका र श्रीलंका भने यसै वर्षको विश्वकपको प्रदर्शन अनुसार विश्वकपमा छनोट भइसकेका छन् ।

यता आईसीसीको वरीयता अनुसार अफगानिस्तान र बंगलादेश पनि विश्वकपमा छनोट भएका छन् ।

बाँकी ८ टिम क्षेत्रीय छनोटबाट आउने आईसीसीले जनाएको छ ।