एउटा मतपत्र अर्को बाकसमा परेको भन्दै मोरङमा एकैपटक गणना गर्ने तयारी

विराटनगर - मतदानको समयमा प्रत्यक्ष र समानुपातिकतर्फको मतपत्र एक अर्को मतपेटिकामा परेपछि मोरङका ६ वटै निर्वाचन क्षेत्रमा प्रतिनिधिसभा, प्रदेशसभा र समानुपातिकतर्फको मतगणना एकैपटक हुने भएको छ । सोमबार बिहान बसेको मोरङ क्षेत्र नम्बर ४, ५ र ६ को संयुक्त सर्वदलीय बैठकले प्रतिनिधिसभा प्रत्यक्षतर्फको मतगणना गर्दा प्रतिनिधिसभाकै समानुपातिक र प्रदेशसभा क्षेत्रको प्रत्यक्ष र समानुपातिकतर्फको पनि मतगणना गर्ने निर्णय भएको जनाइएको छ ।

निर्वाचन आयोगले देशैभरी एउटाको मतपत्र अर्को मतपेटिकामा परेको रिपोर्ट आएको भन्दै आइतबार सबै निर्वाचन अधिकृतको कार्यालयलाई एक क्षेत्रको मतगणना गर्दा प्रत्यक्ष र समानुपातिकतर्फको पनि मतगणना गर्न निर्देशन दिएको थियो । सर्वदलीय बैठकले समेत आयोगको उक्त निर्देशन बमोजिम निर्णय गरेको मुख्य निर्वाचन अधिकृतको कार्यालय विराटनगरका सूचना अधिकारी हेमबहादुर बुढाथोकीले जानकारी दिए ।

त्यसको मतपत्र समानुपातिकको मतपेटिका, प्रदेशसभाको मतपेटिका पनि मतपत्र परेको हुनेसक्ने बिषयलाई आधार मानेर एकैपटक गणना गर्ने तयारी गरेको हो । एकैपटक मतगणना गर्नुपर्ने भएकोले त्यसको व्यवस्थापनका लागि समय लागेर १ बजेदेखि मतगणना गर्नुपरेको मुख्य निर्वाचन अधिकृतको कार्यालयका सूचना अधिकारी हेमबहादुर बुढाथोकीले जानकारी दिए ।

उनले सर्वदलीय बैठकमा समेत त्यस विषयमा सहमति भएको बताए । यसअघि मोरङको क्षेत्र नम्बर ४, ५ र ६ को मतगणनाका लागि तीन तीनवटा गणनास्थल निर्माण गरिएकोमा एकैपटक प्रतिनिधिसभा, प्रदेशसभा र त्यसको समानुपातिकतर्फको पनि मतगणना गर्नुपर्ने भएकोले ४ ठाउँमा गणना गरिने उनले जानकारी दिए ।