रूपन्देहीमा ४ बजेसम्म ५७ प्रतिशत मत खस्याे

बुटवल- रूपन्देहीमा ४ बजेसम्म ५७ प्रतिशत मत खसेको छ । प्रतिनिधिसभा तथा प्रदेशसभा सदस्य चयनका लागि बिहान ७ बजेबाट मतदान भैइरहेको छ ।
रूपन्देहीमा ६ लाख ३८ हजार ९५२ जना मतदाता छन् ।

स्थानीय तहमा भन्दा अहिले  मतदाताको सहभागिता र उत्साह केही कम देखिएको  निर्वाचन कार्यालय रूपन्देहीका प्रमुख अयोध्या भण्डारीले जानकारी दिए ।

कार्यालयका अनुसार रूपन्देहीमा २८ राजनीतिक दल चुनावी प्रतिस्पर्धामा छन् । पाँच निर्वाचन क्षेत्र रहेको रूपन्देहीमा २०३ जनाले उम्मेदवारी दिएका छन् ।

जिल्लाका अधिकांश मतदान केन्द्रमा शान्तिपूर्ण र उत्साहजनक रूपमा मतदान सम्पन्न भएको जिल्ला निर्वाचन अधिकारी भण्डारीले जानकारी दिए । साँझ ५ बजेसम्म मतदान स्थलमा प्रवेश गरेकाले मतदान गर्न पाउनेछन् ।

रूपन्देहीमा २०८ मतदान स्थलमा ७०२ मतदान केन्द्र छन् । पाँचवटा अस्थायी मतदाताका लागि स्थल थपिएको छ । मतगणनाका लागि निर्वाचन आयोगले मतगणना स्थलमा आवश्यकताअनुसार व्यवस्थापन गरिसकेको र राति १० बजेदेखि मतगणना सुरु गर्ने तयारी छ ।