देउवा र प्रचण्डको दाबीः गठबन्धन १५ वर्षसम्म पनि कायम रहन्छ

सुर्खेत । प्रधानमन्त्री एवं नेपाली कांग्रेसका सभापति शेरबहादुर देउवाले गठबन्धन अझै १५ वर्षसम्म कायम रहने बताएका छन् । देउवाले देशको शान्ति र समृद्धिका लागि गरिएको गठबन्धनलाई विजयी गराउन सुर्खेतका मतदातामाझ आग्रह गरेका छन् । 

आज पूर्वी सुर्खेतको मेहलकुनामा आयोजित गठबन्धनको चुनावी सभालाई सम्बोधन गर्दै उनले ओलीको संसद् विघटन र प्रतिगमनकारी कदमविरुद्ध बनेको गठबन्धन भएकाले देश र समृद्धिका लागि गठबन्धन आवश्यक रहेको उल्लेख गरे । ‘ओलीजीले दुई पटक संसद् विघटन गर्नुभयो । संविधानको अंगभंग गर्ने काम गर्नुभयो, हामी संसद्को पूर्ण कार्यकाल राख्न चाहन्छौँ’ उनी भन्छन्, ‘माननीयहरुले आलोचना गर्ने बित्तिकै ओलीको जसरी संसद् विघटन गर्दैनौँ ।’ देउवाले संविधानको रक्षा र गणतन्त्रको संस्थागत हितका लागि गठबन्धनले निर्वाचन जित्न आवश्यक रहेको औल्याए ।

सोही कार्यक्रममा बोल्दै नेकपा माओवादी केन्द्रका अध्यक्ष पुष्पकमल दाहाल प्रचण्डले ओलीको अहंकारका कारण वाम गठबन्धन टुटेको बताए । चुनावी सभालाई सम्बोधन गर्दै उनले वामपन्थीको गोलभित्र अंहकारी रूपमा ओली उदाएकाले वाम गठबन्धन टुटेको स्पष्ट पारेका हुन् । ‘अब धोकेवाजसँग कुनै समीकरण हुदैन’ प्रचण्डले भने, ‘गिरिजाप्रसाद कोइरालासँगै मैले १२ बुँदे सम्झौतामा हस्ताक्षर गरेर जोडेको गठबन्धन हो यो चुनावसम्म मात्र होइन लामो समयसम्म कायम रहन्छ ।’

‘गठबन्धन १५ वर्ष जाने छ र देशमा शान्तिको नयाँ युगको सुरुवात हुने’ उनले भने, ‘यो गठबन्धन संविधानको रक्षा र शान्ति प्रक्रियाका बाँकी रहेका कामहरुलाई अगाडि बढाउनका लागि गरिएको गठबन्धन हो ।’देशमा राजनीतिक परिवर्तन अनुकुल आर्थिक समृद्धि नभएसम्म गठबन्धन कायम रहने पनि उनले बताए ।

प्रचण्डले परिवर्तनको रक्षाका लागि यो गठबन्धन भएको दाबी गरे । साथै संविधानको रक्षा र शान्ति प्रक्रियाका बाँकी काम र समृद्धिको लागि बनाइएको उनको भनाई थियो । उनले परिवर्तनलाई उल्टाउने प्रयास कसैले गर्न नसक्ने दाबी पनि गरे । उनले देशको रक्षाका लागि गठबन्धनको आवश्यक रहेको उल्लेख गरे ।