टी-ट्वान्टी विश्वकपः इंग्ल्यान्डलाई पाकिस्तानको १३८ रनको लक्ष्य

काठमाडौँ- अस्ट्रेलियामा जारी आईसीसी टी-ट्वान्टी विश्वकप क्रिकेटको फाइनलमा पाकिस्तानले इंग्ल्यान्डलाई जितका लागि १३८ रनको लक्ष्य दिएको छ ।

मेलवर्नमा टस हारेर पहिले ब्याटिङ गरेको पाकिस्तानले निर्धारित २० ओभरमा ८ विकेट गुमाएर १३७ रन जोड्यो । पाकिस्तानका लागि शान मसुदले ३८ रनको योगदान गरे । कप्तान बाबर आजमले ३२ रन बनाए । मोहम्मद रिजवानले १५ रन जोडे ।

इंग्ल्यान्डका लागि साम कुरानले ३ तथा क्रिस जोर्डनले र आदिल रसिदले २-२ विकेट लिए । बेन स्टोक्स एक विकेट हात पारे ।

सेमिफाइनलमा पाकिस्तानले न्यूजिल्यान्डलाई ७ विकेट तथा इंग्ल्यान्डले भारतलाई १० विकेटले पराजित गर्दै फाइनलमा स्थान सुरक्षित गरेका हुन् ।

पाकिस्तान र इंग्ल्यान्ड दुवैले एक-एक पटक उपाधि हात पारेका छन् । सन् २००९ मा इंग्ल्यान्डमा भएको फाइनलमा श्रीलंकालाई ८ विकेटले पराजित गर्दै पाकिस्तानले उपाधि जितेको थियो । त्यसैगरी, सन् २०१० मा वेस्ट इन्डिजमा भएको फाइनलमा इंग्ल्यान्डले अस्ट्रेलियालाई ७ विकेटले पराजित गर्दै उपाधि चुमेको थियो ।