पाकिस्तान र इंग्ल्यान्डले टी-ट्वान्टी विश्वकपको उपाधि बाँड्ने सम्भावना

काठमाडौँ- अस्ट्रेलियामा जारी आईसीसी टी-ट्वान्टी विश्वकप क्रिकेटको उपाधि पाकिस्तान र इंग्ल्यान्डले बाँड्ने सम्भावना बढेको छ । पाकिस्तान र इंग्ल्यान्डबीच आइतबार मेलवर्न क्रिकेट ग्राउन्डमा फाइनल हुने तालिका रहेको छ ।

तर आइतबार मेलवर्न क्रिकेट ग्राउन्डमा भारी वर्षा हुने मौसम पूर्वानुमान गरिएको आईएएनएसले जनाएको छ । त्यसैगरी, रिजर्भका लागि रहेको सोमबार पनि वर्षा हुने पूर्वानुमान गरिएको छ ।

मेलवर्न मौसम विज्ञान ब्यूरोले आइतबार आँधीको सम्भावनाका साथ शतप्रतिशत वर्षाको सम्भावना रहेको भविष्यवाणी गरेको छ । रिजर्भ दिन पाँच देखि १० मिलिमिटर वर्षाको ९५ प्रतिशत सम्भावना रहेको छ ।

यदि आइतबार र सोमबार दुवै दिन खेल हुने सकेन भने पाकिस्तान र इंग्ल्यान्डले उपाधि बाँड्नेछन् । तर आईसीसीले भने कम्तिमा पनि १० ओभरको खेल हुन सक्ने सम्भावना रहेको जनाएको छ ।