बागमती नदीमा छाडियाे १ लाख माछाका भुरा

मकवानपुर- मकवानपुरको बागमती नदीमा १ लाख माछाका भुरा छाडिएको छ । बिहीबार प्राकृतिक जलाशय मत्स्‍य प्रवर्द्धन एवं संरक्षण केन्द्र हेटौंडा मकवानपुरले रहु र नैनी जातका १ लाख माछाका भुरा बागमती नदीमा छाडेको हो ।

केन्द्रका कार्यालयका प्रमुख सरोजकुमार यादवले प्राकृतिक जलाशयमा जलीय जैविक विविधता संरक्षण तथा त्यसमा आश्रित समुदायको जीवन उकास्नका लागि स्थानीय जातको माछा छाड्ने कार्यक्रम गरिएको बताए । खोला नालामा फोहोर ढल मिसाउने, विषादी हाल्ने, करेन्ट लगाउनेलगायतका कारणबाट जलचर मासिने क्रम बढेकाले यसको संरक्षण गरी नदीमा आश्रित समुदायको जीवनस्तर विकासका लागि यस्तो गरेको यादवले बताए ।

उनका अनुसार नेपालमा ४ लाख १ हजार हेक्टर प्राकृतिक जलाशयको क्षेत्रफल रहेको र देशमा उत्पादन हुने कूल ९७ हजार मेट्रिक टन माछा मध्ये २१ प्रतिशत माछा प्राकृतिक जलाशयबाट उत्पादन हुन्छ । जसमध्ये प्राकृतिक जलाशयमा ४ लाख जनसंख्या निर्भर रहेको समेत यादवले जिकिर गरे ।

कार्यालयले यसअघि नारायणी नदीमा ४० हजार भुरा छोडेको थियो भने मकवानपुरको सामारी नदीमा पनि ३४ हजार माछाका भुरा छाडेका थियो । आर्थिक वर्ष ०७९/८० को कार्यालयको वार्षिक कार्यक्रमको रूपमा ६ वटा कार्यक्रम रहेकोमा आगामी कार्यक्रम कोशी, कर्णाली, सप्तकोशी, कालीगण्डकी लगायतका नदीहरूमा रहेको जानकारी गराइएको थियो ।

बागमती गाउँपालिका अध्यक्ष सर्केश घलानले गाउँपालिकामा पनि माछा मारेर जिविका चलाउने गर्ने समुदाय रहेको भन्दै भविष्यमा यो कार्यले उक्त समुदायलाई सहयोग पुग्ने बताए । घलानले वर्तमान समयमा खोला नालामा  विभिन्न विद्युतीय उपकरणको प्रयोग र कलकारखानाबाट फालिएका विभिन्न केमीकलहरूले गर्दा खोलानालामा माछाको संख्या घट्न पुगेकाले सबै मिलेर यस्तो कार्य रोक्नुपर्ने बताए ।