माडीको अयोध्याधाममा राखियो रामसीताको मूर्ति

चितवन : चितवनको माडी नगरपालिका-९ स्थित अयोध्याधाममा राम, सीता, लक्ष्मण र हनुमानको मूर्ति राखिएको छ । आज रामनवमी पर्वको अवसरमा अयोध्याधाममा रामसीताको मूर्ती राखिएको हो । 

मूर्ति आज बिहान देवघाटधामबाट पूजा गरेर माडीको अयोध्याधाममा ल्याइएको थियो । माडीमा बाजा-गाजासहित मूर्तिहरूलाई स्वागत गरिएको थियो । 
प्रधानमन्त्री केपी शर्मा ओलीले रामको जन्मभूमि चितवनको अयोध्या भएको दाबी गर्दै आएका छन् । 

अयोध्यामा राम मन्दिर बनाउने पनि सरकारको तयारी छ । अहिले अस्थायी मन्दिरमा राखिएको मूर्तिलाई पछि मूल मन्दिर बनाएर राख्ने योजना रहेको अयोध्याधाम प्रचार समितिका संयोजक श्री दवाडीले जानकारी दिए ।

मूर्तिलाई माडीमा लगेपछि परशुराम कुण्डको जलले जल अभिषेक गरिएको थियो । संस्कृति तथा पर्यटन तथा नागरिक उड्डयनमन्त्री भानुभक्त ढकाल, प्रदेश-२ का प्रदेश प्रमुख राजेश अहिराज, बागमती प्रदेशका मुख्यमन्त्री डोरमणि पौडेलको उपस्थितिमा मन्दिरमा मूर्ति राखिएको हो । 

बागमती प्रदेशका मुख्यमन्त्री पौडेलले अयोध्याधामको विकासका लागि प्रदेश सरकारले लगानी गर्ने बताएका छन् ।