कोभिड–१९ सङ्क्रमित ७४ वर्षे पुरुषको होम आइसोलेसनमै मृत्यु

हेटौंडा : मकवानपुरमा कोभिड–१९ सङ्क्रमण पुष्टि भइसकेका एक बृद्धको मृत्यु भएको छ । होम आइसोलेसनमा बस्दै आएका ७४ वर्षे पुरुषको मृत्यु भएको हेटौंडा उपमहानगरपालिकाका जनस्वास्थ्य निरीक्षक भोला चौलागाईले जानकारी दिए । 

बैशाख ५ गते पीसीआर परीक्षण गर्दा कोभिड–१९ सङ्क्रमण पुष्टि भएपछि बृद्ध हेटौंडा–४, कर्रास्थित होम आइसोलेसनमा बस्दै आएका थिए । यो मृत्युसँगै हालसम्म हेटौंडामा २७ जनाको कोभिड संक्रमणका कारण मृत्यु भएको छ । 

मकवानपुर जिल्लामा भने हालसम्म ३३ जनाको मृत्यु भएको जिल्ला स्वास्थ्य कार्यालय मकवानपुरले जानकारी दिएको छ । मकवानपुरमा संस्थागत आइसोलेसनको व्यस्थापन नहुँदा सङ्क्रमितहरु होम आइसोलेसनमै बस्दै आएका छन् ।