धनगढीका १ सय ४० जेष्ठ नागरिक मुक्तिनाथ धार्मिक यात्रामा

कैलाली । धनगढी उपमहानगरपालिका भित्रका जेष्ठ नागरिकहरु मुक्तिनाथ धार्मिक यात्रामा निस्केका छन् । धार्मिक यात्रामा जाने जेष्ठ नागरिकहरुलाई धनगढी उपमहानगरपालिका मेयर गोपाल हमालले आज बिदाई गरेका छन् ।

उपमहानगरपालिकाका ६८ देखि ९२ वर्षसम्मका १४० जनालाई पहिलो चरणमा धार्मिक टुरमा पठाइएको नगर प्रमुख हमालले बताए । उनले धार्मिक यात्रामा उपमहानगरपालिकामा कार्यरत केही कर्मचारीहरुलाई समेत समावेश गरिएको बताउँदै जागिरको सिलसिलामा सेवा निवृत्त हुन लागेका केही कर्मचारी समेतलाई धार्मिक यात्रामा समाबेश गरिएको बताए ।

नगढी स्थित लक्ष्मीनारायण मन्दिरले यात्राको व्यवस्थापनको सम्पूर्ण जिम्मेवारी मिलाएको बताउदै मेयर हमालले यात्राको दौरान स्वास्थ्यमा समस्या आए त्यसको समाधानका लागि उपमहानगरपालिकामा कार्यरत स्वास्थ्य शाखाबाट समेत स्वास्थ्यकर्मी समावेश गराइएको बताए । बिदाई कार्यक्रममा उपमहानगरपालिकाका उपमेयर, धार्मिक यात्रामा जान लागेका आफन्तहरुको सहभागिता रहेको थियो ।