एक दिन पर सर्‍यो कांग्रेस केन्द्रीय समिति

काठमाडौं : प्रमुख प्रतिपक्षी दल नेपाली कांग्रेस केन्द्रीय कार्यसमिति बैठक फेरि सरेको छ । कांग्रेस केन्द्रीय कार्यालयले बुधबार विज्ञप्ति निकालेर बैठक एक दिन सारिएको जनाएको छ । 

'कार्तिक २७ गते बिहीबार दिनको १ बजे पार्टीको केन्द्रीय कार्यालयमा बस्‍ने गरी केन्द्रीय कार्य सिमिति  बैठक तोकिएकोमा उक्त बैठक २०७७ कार्तिक २८ गते शुक्रबार दिनको १ बजे बस्‍ने भएको छ,' केन्द्रीय कार्यालयका मुख्य सचिव कृष्णप्रसाद पौडेलद्वारा बुधबार जारी विज्ञप्तिमा उल्लेख छ । 

का‌ग्रेसले यसअघि २४ गते बस्‍ने भनेको बैठक २७ गतेका लागि सारेको थियो । त्यसअघि २१ गतेका लागि बैठक बोलाइएको थियो । 

आगामी फागुन ६ देखि १० गतेसम्म पार्टीको १४ औं महाधिवेशन गर्ने कार्यतालिकासहितको मिति सार्वजनिक गरेको कांग्रेसले कोभिड-१९ का कारण त्यो मितिमा महाधिवेशन गर्न असम्भव भएपछि सार्नका लागि बैठक बोलाएको हो ।